«Ժառանգություն» կուսակցության գլխավոր քարտուղար Ստյոպա Սաֆարյանը «Հայաստանի ճանապարհը դեպի Եվրոպա. խոչընդոտներ և հնարավորություններ» թեմայով քննարկմանը նշեց, որ ՀՀ իշխանությունները և հասարակությունը երբեք չեն ասել, որ մենք գնում ենք դեպի Եվրոպա:
Ըստ բանախոսի՝ որպես պետություն՝ մենք կայանալու մեկ ճանապարհ ունենք, այն է՝ արևմտյան ժողովրդավարական լավ կառավարում, մարդակենտրոն քաղաքականություն ենթադրող պետական կառուցվածք և պետություն, իսկ դա եվրոպական աշխարհամասն է:
Ստյոպա Սաֆարյանի համոզմամբ՝ Հայաստանը ունի մեկ ճանապարհ՝ եվրոպական տեսակի պետության կայացումը: Նրա խոսքով՝ թեև չունենք ռեսուրսներ, սակայն ունենք հնարամիտ հայ մարդ, բիզնեսին, առևտրին հակված հայ մարդ, որին պետք է տրվեն ազատության մեծ աստիճան, արդար պայմաններ, գործելու ազատություն, իսկ դա հենց Եվրոպան կարող է տալ:
«Հայաստանը իր ամբողջության մեջ իբրև հասարակություն նպատակ չի դրել դառնալ ԵՄ անդամ, և ԵՄ-ն էլ մեզ գրկաբաց, մանավանդ՝ ռուսական ռազմաբազաներով, չի սպասում»,- ասաց նա:
«Մեր միակ այլընտրանքը եվրոպական տիպի պետություն ունենալն է, սակայն այս ճանապարհին թիվ մեկ խոչընդոտը ՀՀ իշխանությունն է»,- եզրափակեց նա:
