ՀՀ թրաֆիքինգի դեմ պայքարի ազգային խորհրդին կից աշխատանքային խմբի ղեկավար Վահրամ Կաժոյանը այսօր լրագրողների հետ հանդիպան ժամանակ անդրադարձավ Հայաստանում մարդկանց թրաֆիքինգի մասին ԱՄՆ պետդեպի զեկույցին։
Հիշեցնենք, որ այս տարվա զեկույցը նախորդ 5-ից տարբերվում է նրանով, որ ավելի խիստ է և փաստում է թրաֆիքինգի բոլոր տեսակների իրականացումը Հայաստանում։ Բավականին վատ ցուցանիշներ ունենալու արդյունքում Հայաստանը շարունակում է մնալ երկրորդ խմբի երկրիների շարքում։
«Զեկույցն ընդունում ենք որպես տեղեկատվություն։ Մենք պետք է ի գիտություն ընդունենք այն, ինչ արդեն ունենք և դիտողությունների հիման վրա կազմակերպենք հետագա աշխատանքը»,-այսպես է գնահատում ԱՄՆ պետդեպի զեկույցը Վահրամ Կաժոյանը։
Հիշեցնելով 2002 թվականից ի վեր պետական միջոցների այն ցանկը և գերատեսչություների այն ծրագրերը, որ կառավարությունը տրամադրել է թրաֆիքինգի դեմ պայքարին՝ Վահրամ Կաժոյանը հուսադրում է և առաջարկում շատ չմտահոգվել ԱՄՆ զեկույցի արդյունքներից։
«Այն, որ ոստիկանությունը բացահայտում է նման դեպքերը, որ դատարանները թրաֆիքինգ իրականացնողների դեմ խիստ դատավճիռներ են կայացնում, վկայում է այն մասին, որ մեր կառավարությունը պատրաստակամ է այդ խնդրի դեմ պայքարել։ Իմ կարծիքով դա ավելի կարևոր է, քան պետդեպարտամենտի զեկույցը։ Թե ինչ կմտածեն ամերիկացիները, դա երկրորդական է»,- ասում է Վահրամ Կաժոյանը։
Կաժոյանն իր անհամաձայնությունն է հայտնում զեկույցի այն կետին, որտեղ նշվում է, թե հայերն աշխատանքային թրաֆիքինգի են ենթարկվում նաև Հայաստանում։ «Այո, աշխատանքի չարաշահման երևույթը կա, բայց դա չի կարելի նույնացնել թրաֆիքինգի հետ, քանի որ տեղի է ունենում առանց սահմանը հատելու»,- ասում է Կաժոյանը։
Իսկ այն հայտարարությունը, թե Հայաստանում կտրուկ նվազել է հետաքննությունների բացահայտման թիվը՝ ՀՀ թրաֆիքինգի դեմ պայքարի ազգային խորհրդին կից աշխատանքային խմբի ղեկավարը բացատրում է հարուցված դատական հայցերի զուտ թվի պակասով։
«Սա այն բացառիկ զեկույցն է, որ ԱՄՆ-ն իրականացնում է նաև հենց իր շահերից դրդված։ Մեր սպասելիքներն արդարացան, և Հայաստանը մնաց երկրորդ խմբում»,-ասում է ազգային խորհդրին կից աշխատանքային խմբի ղեկավար Վահրամ Կաժոյանը՝ համոզմունք հայտնելով, որ նույն կերպ աշխատանանք տանելով թրաֆիքինգի դեմ պայքարում՝ հաջորդ զեկույցում մենք կհայտնվենք առաջին խմբում։
