ՊԵԿ-ի ու ՊԵԿ նախագահի շուրջ աղմուկը նոր ու հետաքրքիր փաստեր է հանում ջրի երես։
Մասնավորապես «Առաջին լրատվական»-ին հայտնի է դարձել, որ տարիներ առաջ մարդկանց պարտադրված պարտադիր կուտակային կենսաթոշակային ֆոնդերից մեկի՝ «Կապիտալ Ասեթ Մենեջմենթ» ՓԲԸ-ի խորհրդի նախագահը՝ Հովհաննես Պետրոսյանը, միաժամանակ հանդիսանում է նաև ՊԵԿ նախագահ Դավիթ Անանյանին պատկանող «Փի-էյջ-Փի Փարթնըրզ» ՓԲԸ-ի հիմնադրման նախաձեռնողը, հիմնադիր բաժնետերերից մեկը, ինչպես նաև ընկերության տնօրենը։ Մինչ այդ Հովհաննես Պետրոսյանը հանդիսացել է «Քեյ-Փի-էմ-Ջի Արմենիա» ՓԲԸ-ի ավագ մենեջեր և ղեկավարել է հաշվապահական, խորհրդատվական ծառայությունների բաժինը։ Իսկ մինչ այդ էլ Պետրոսյանը ղեկավարել է Ֆինանսների և էկոնոմիկայի նախարարության հաշվապահական հաշվառում և աուդիտի մեթոդաբանության գլխավոր վարչությունը։
Հայտնի է, որ «Քեյ-Փի-Էմ-Ջի Արմենիա» ՓԲԸ-ն պատկանում է ՊԵԿ նախագահ Դավիթ Անանյանին։ Պետական պաշտոնի անցնելուց հետո էլ նրա կինն ու աղջիկն են զբաղվում այդ գործով։ Անանյանի կենսագրությանը ծանոթանալիս էլ պարզ է դառնում, որ նա
2000-2006 թվականներին աշխատել է «Քեյ-Փի-Էմ-Ջի Արմենիա» ՓԲԸ-ում որպես հարկային խորհրդատու, հարկային մենեջերի օգնական, հարկային մենեջեր, ավագ մենեջեր, հարկային և իրավաբանական բաժնի ղեկավար։ Իսկ 2006-2016 թվականներին եղել է «Փի-Էյջ-Փի Փարթնըրզ» ՓԲԸ-ի հարկային ծառայությունների ղեկավար, գործընկեր, ընկերության կողմից մատուցվող հաշվապահական և հարկային ծառայությունների մատուցման աշխատանքների ղեկավար և/կամ անմիջական մասնակից։
Այսինքն՝ Դավիթ Անանյանին պատկանող ընկերության տնօրենը, որը նաև բաժնետեր է այդ ընկերությանը, հանդիսանում է նաև պարտադիր կուտակային կենսաթոշակային ֆոնդերից մեկի խորհրդի նախագահը։
Նշենք, որ համակարգի ներդրումից հետո շահառուները աղմուկ բարձրացրեցին, թե ՊԵԿ-ն ինքն է պարտադիր կուտակային կենսաթոշակային համակարգի մասնակիցների փոխարեն կենսաթոշակային ֆոնդ և ֆոնդի կառավարիչ ընտրում։ Ինչն ակնհայտորեն գալիս է հիմնավորելու այստեղ առկա շահերի բախումը։ Սակայն ՊԵԿ-ին ուղղված բազմաթիվ քաղաքացիների դիմումներից հետո` ձեռնպահ մնալ ծրագրային մոդուլով քաղաքացու փոխարեն պարտադիր կենսաթոշակային ֆոնդ և ֆոնդի կառավարիչ ընտրելուց, ՊԵԿ-ը պարզաբանում տարածեց, թե ինքը կենսաթոշակային ֆոնդ և ֆոնդի կառավարիչ ընտրելու իրավասություն չունի: «Համաձայն կուտակային կենսաթոշակների մասին» ՀՀ օրենքի` նման իրավասությունով օժտված է պարտադիր կուտակային համակարգի մասնակիցների ռեեստրը վարողը` ՀՀ կենտրոնական դեպոզիտարիան:
Նշենք, որ մեր երկրում գոյություն ունի 3 կենսաթոշակային ֆոնդի կառավարիչ․
1.«Ամունդի-Ակբա Ասեթ Մենեջմենթ» ՓԲԸ – առաջարկում է 3 տեսակի պարտադիր կենսաթոշակային ֆոնդ
2.«Ցե-Կվադրատ Ամպեգա Ասեթ Մենեջմենթ Արմենիա» ՍՊԸ – առաջարկում է 3 տեսակի պարտադիր կենսաթոշակային ֆոնդ
3.«Կապիտալ Ասեթ Մենեջմենթ» ՓԲԸ – առաջարկում է 2 տեսակի կամավոր կենսաթոշակային ֆոնդ
«Կապիտալ Ասեթ Մենեջմենթ» ՓԲԸ-ն Հայաստանում ներդրումային և կամավոր կենսաթոշակային ֆոնդերի առաջին գրանցված կառավարիչն է: Ընկերությունը պետական գրանցում է ստացել 2012 թվականի հոկտեմբերի 18-ին և ստացել ՀՀ Կենտրոնական բանկի կողմից լիցենզիա:
