Ճապոնիայի կենտրոնական մասում վերջին մի քանի տասնամյակների ամենաուժգին ձյան տեղումների հետևանքով մահացածների թիվը հասել է 13-ի, տուժել է շուրջ 1700 մարդ: Այս մասին հայտնում է NHK հեռուստաալիքը:
Տուժածների մասին տվյալները հավաքվել են տարերային աղետի հարվածի տակ հայտնված 32 պրեֆեկտուրաներից: Ավելի վաղ հաղորդվել էր 11 զոհի և ավելի քան 1200 տուժածի մասին՝ 31 պրեֆեկտուրայում: Առավել շատ տուժածներ կան Կանագավա պրեֆեկտուրայում: Տոկիոյում ավելի քան 200 մարդ հարվածներ է ստացել սայթաքուն ճանապարհներին ընկնելու հետևանքով: Մի քանի տասնյակ մարդկանց մոտ գրանցվել են կոտրվածքներ և տարբեր ծանրության ցնցումներ:
Ձյան առատ տեղումները Տոկիոյում և հարակից շրջաններում շարունակվում են շաբաթ առավոտից: Մայրաքաղաքի որոշ շրջաններում ձյան ծածկույթի բարձրությունը հասնում է 27 սմ-ի, ինչը վերջին 45 տարում ռեկորդային է:
Սենդայ քաղաքում ձնածածկույթի հաստությունը հասնում է 35 սմ-ի, ինչը 78-ամյա վաղեմության ռեկորդ է:
Մասնագետները նշում են, որ Տոկիոյում ներկայիս տեղումները սաստկությամբ երրորդն են՝ 1969 թվականից ի վեր:Ներկայում ավելի քան 1800 տնտեսություններ Իբարակի, Միյագի և Ֆուկուսիմա պրեֆեկտուրաներում մնում են առանց էլեկտրականության:
