Թուրքիայի դատարանը որոշում է ընդունել ձերբակալել Ուկրաինայի քաղաքացուն, ով փետրվարի 7-ին փորձել է Խարկով-Ստամբուլ չվերթն իրականացնող Pegasus Airlines ավիաընկերության օդանավի անձնակազմին պարտադրել փոխել երթուղին: «Երեկ դատարանը որոշում է ընդունել ուկրաինացու նկատմամբ որպես խափանման միջոց ընտրել կալանքը»,- Interfax-ին հայտնել է Ուկրաինայի ԱԳՆ տեղեկատվական քաղաքականության դեպարտամենտի ղեկավար Եվգենի Պերեբիյնիսը:
Նրա խոսքով՝ ձերբակալված ուկրաինացին գտնվում է Ստամբուլում: Կիրակի նրան այցելել է ուկրաինացի հյուպատոսը: ԱԳՆ-ում նշել են, որ ձերբակալվածի առողջական վիճակը բավարար է, պահման պայմանների վերաբերյալ բողոքներ չկան, նա ապահովված է փաստաբանով և թարգմանչով:
Ինչպես հաղորդվել է, փետրվարի 7-ի երեկոյան Ուկրաինայի անսթափ քաղաքացին փորձել է ստիպել Boeing 737-800 օդանավի անձնակազմին ուղղությունը փոխել դեպի Սոչի:
Արդյունքում հաջողվել էր օդանավը կործանիչների ուղեկցությամբ իջեցնել Ստամբուլում, որտեղ Թուրքիայի հատուկ ծառայությունները ձերբակալել էին նրան: Օդանավի սրահը խուզարկել էին, սակայն որևէ պայթուցիկ սարք չէին հայտնաբերել:
Ուկրաինայի Անվտանգության ծառայության Խարկովի շրջանի քննչական վարչությունը մինչդատական քննություն է սկսել ահաբեկչության իրականացման սպառնալիքի փաստով:
Ստամբուլում Ուկրաինայի գլխավոր հյուպատոսարանը տվյալ գործի շրջանակում աշխատում է թուրքական իշխանությունների ու իրավապահների հետ: Ուղևորի գործողությունները քրեորեն պատժելի են ինչպես Թուրքիայում, այնպես էլ Ուկրաինայում: