Արմավիրի մարզպետարանում այսօր կայացած խորհրդակցությամբ ամփոփվել է ՀՀ փոխվարչապետ, տարածքային կառավարման նախարար Արմեն Գևորգյանի կողմից անցկացվող մարզային խորհրդակցությունները, որոնց ընթացքում ներկայացվում էին 2014թ. ծրագրերն ու 2013թ. կատարված աշխատանքները:
Խորհրդակցությանը, որին մասնակցել են մարզպետ Աշոտ Ղահրամանյանը, մարզի քաղաքային համայնքների ղեկավարներ, ինչպես նաև Տարածքային կառավարման նախարարության և մարզպետարանի պատասխանատուներ, զեկուցվեցին մարզային զարգացման ծրագրի կատարման արդյունքները: Նշվել է, որ 2013թ. ծրագրով նախատեսված 119 միջոցառումից կատարվել է 96-ը: Մարզում 2013թ. ընդհանուր առմամբ իրականացվել է շուրջ 7 մլրդ դրամի ներդրում, որից 2,8 մլրդ դրամ ուղղվել է ենթակառուցվածքների, 1,4-ական մլրդ դրամ` սոցիալական և կրթության, 1,2-ական մլրդ դրամ` քաղաքաշինության և գյուղատնտեսության ոլորտներին:
Մարզի համայնքների բյուջեների 2013թ. ընդամենը եկամուտների կատարողականը կազմել է 100, 1%: 2012 թ. համեմատությամբ ընդամենը եկամուտների ցուցանիշն աճել է 9,1 %-ով կամ 454,4 մլն դրամով: Սեփական եկամուտների կատարողականը (5 հարկատեսակների գծով) կազմել է 102,4 %: 2012թ. համեմատությամբ սեփական եկամուտներն աճել են 2,6%-ով: Հողի հարկի հավաքագրումը կատարվել է 99,7 %-ով, գույքահարկինը` 109,7 %-ով:
Փոխվարչապետն ընդհանուր առմամբ դրական գնահատելով կատարողականի ցուցանիշները` անդրադարձել է խոշոր հարկատուների կողմից մարզի համայնքների նկատմամբ պարտավորությունների հարցին: Հունվարի 10-ի դրությամբ միայն հողի հարկի և գույքահարկի մասով խոշոր հարկատուների ունեցած պարտավորությունը կազմում է 202 մլն դրամ: Փոխվարչապետը հատկապես համայնքների ղեկավարների ուշադրությունը հրավիրել է այդ տվյալների վրա` հորդորելով հետևողական լինել, որպեսզի ժամանակին բոլոր պարտավորությունները կատարվեն:
Խորհրդակցության ընթացքում մարզպետը տեղեկություններ է ներկայացրել 2013թ. կարկտահարությունից տուժած համայնքներին ցուցաբերված աջակցության ծրագրերի մասին: Փոխվարչապետը տեղեկացրել է, որ մինչև ապրիլ հանրապետության տարածքում կտեղադրվի 80 նոր հակակարկտային կայանք, որից միայն 50-ը` Արմավիրի մարզում: Հակակարկտային նոր կայանքների ձեռքբերման և գործողների նորոգման նպատակով կառավարությունը 2013թ. հունիս 6-ի որոշմամբ 350 մլն դրամ էր հատկացրել, որից 50 մլն դրամն ուղղվել է Արտակարգ իրավիճակների նախարարության համակարգում գտնվող մարզային կառավարման կենտրոնների արդիականացմանը, իսկ մնացածը` նոր կայանքների ձեռքբերմանը:
Քննարկվել են նաև մարզի համայնքների 2014թ. բյուջեների կատարմանը, մարզպետարանների և համայնքային ենթակայության հիմնարկներում, համայնքապետարաններում աշխատանքների արդյունավետ կազմակերպմանը, մարզում գյուղատնտեսության աջակցության պետական ծրագրերի կատարմանը, մարզի համայնքներում 2013թ. իրականացված վարչական հսկողության արդյունքներին վերաբերող և ընթացիկ մի շարք այլ հարցեր: Տեղեկություններ ներկայացվեց նաև մարզի համայնքներում էլեկտրոնային համակարգերի ներդրման գործընթացի վերբերյալ: Նշվել է, որ ներկայումս Համայնքային կառավարման տեղեկատվական համակարգ է ներդրված մարզի 97 համայնքից 74-ում: Աշխատանքներ են իրականացվում նաև մյուս համայնքներում համակարգը ներդնելու ուղղությամբ:
Փոխվարչապետը նշել է, որ վերջին շաբաթներին մարզերում անցկացված խորհրդակցությունների ընթացքում բարձրացված մի շարք հարցեր կառավարությունում կքննարկվեն շահագրգիռ մարմինների ներկայացուցիչների մասնակցությամբ և լուծումներ կառաջարկվեն:
