Այսօր՝ 2019 թվականի հունվարի 14-ին, մեկնարկեց 7-րդ գումարման Ազգային ժողովի առաջին նստաշրջանը: Այն վարում է «Իմ քայլը» դաշինքից ընտրված ԱԺ ամենատարեց պատգամավոր Կնյազ Հասանովը:
Նիստին ներկա էր ՀՀ նախագահ Արմեն Սարգսյանը: Ողջույնի խոսքով հանդես գալով՝ Արմեն Սարգսյանը բոլոր պատգամավորներին մաղթեց արդյունավետ աշխատանք. «2018 թվականը մեծ փոփոխությունների տարի էր, մեր ժողովրդի քաղաքական ոգու բազմաթիվ դրսևորումների տարի էր: Նոր Ազգային ժողովի ձևավորմամբ ավարտվում է քաղաքական փոփոխությունների 1-ին փուլը, և սկսվում է խոստումների իրականացման հետևողական, համառ և ամենօրյա աշխատանքի փուլ»:
Նրա խոսքով՝ պատգամավորների աշխատանքի հաջողությունը պայմանավորված է լինելու նաև ՀՀ քաղաքացու աջակցությունից: «Նոր Հայաստանը կառուցելու համար դեռ բազում և լուրջ բարեփոխումներ պետք է իրականացվեն բոլոր բնագավառներում: Նոր Հայաստանում մեզնից յուրաքանչյուրը նույնպես պետք է անձնապես բարեփոխվի: 21-րդ դարը սրընթաց փոփոխությունների դար է, և մենք պետք է վերափոխենք մեր մտածելակերպն ու մոտեցումները: Փոփոխվում են ժամանակները, բայց անփոփոխ են մեր նպատակները», մասնավորապես հայտարարեց նա:
Ողջույնի խոսքերից ՀՀ ԱԺ պատգամավորները երդվեցին:
Մանրամասները՝ տեսանյութում:
