Մարտի 1-ի գործով քննչական խմբի ղեկավար Վահագն Հարությունյանն այսօր ի պատասխան «Ազատություն» ռադիոկայանի հարցի՝ ասել է, որ հատուկ քննչական ծառայությանը չի հաջողվել պարզել, թե ովքեր են այն ոստիկանները, ովքեր 2008 թվականի մարտի 1-ի իրադարձությունների ժամանակ Լեո-Պարոնյան հատվածում ջրցան մեքենայի կողքին խմբված իրավապահների միջից հորիզոնական ուղղությամբ կրակոցներ են արձակում:
YouTube-ում հայտնված այս կադրերը Հատուկ քննչական ծառայությունը սկսել էր ուսումնասիրել անցած ամսվանից: Պարզվել է, որ կրակողները ոստիկանության աշխատակիցներ են, սակայն չի հաջողվել նույնականացնել նրանց դեմքերը:
«Տեսապատկերները ենթական չեն նույնականացման համակարգչային ավտոմատացված եղանակով: Մեր փորձագետների տրամադրության տակ ունեցած տեխնիկայի միջոցով այսօրվա դրությամբ արձանագրվել է, որ հնարավոր չէ»:
Հարցին, թե արդյո՞ք հաջողվել է պարզել, թե ինչ զենքից են կրակում ոստիկանության աշխատակիցները, Վահագն Հարությունյանը պատասխանել է, թե տեսանյութում դա չի երևում, և այդ հարցի պատասխանը տալու համար կնշանակվի փորձաքննություն:
«Ձգաբանների և համակարգչային տեխնիկայի մասնագետների ներգրավմամբ կփորձենք պարզել, թե ինչ տեսակի զենքեր են այդ տեսանյութում կիրառվում», – ասել է Հարությունյանը՝ զենքի որեւէ տեսակի կիրառումը չբացառելով.- «Չի բացառվում` «Կոռնետ» ատրճանակը, որը սովորական ատրճանակ է, արտաքինից ոչ մի բանով չի տարբերվում, սակայն այն անգնդակ փամփուշտներ է կրակում: АК-74 ինքնաձիգը օգտագործել են այդ օրը և՛ անգնդակ փամփուշտներով, և՛ լուսածրային մարտական փամփուշտներով: Այս պահին հստակ ասել, որ դա եղել է ատրճանակ, հատուկ միջոց, ինքնաձիգ, թե այլ տեսակի զենք, դեռևս հնարավոր չէ»:
Վահագն Հարությունյանը տեղեկացրել է, որ Մարտի 1-ի սպանությունների գործով դեռևս բացահայտումներ չկան: Սակայն, նրա խոսքով, Հատուկ քննչական ծառայությանը հայտնի է դարձել, թե ով է YouTube-ում տեղադրում Մարտի 1-ի վերաբերյալ տեսանյութերը, եւ առաջիկայում այդ անձը կհրավիրվի հարցաքննության:
Աղբյուրը՝ azatutyun.am
