Գազի սակագնի բարձրացման մասին հարցն առաջ քաշելը կարելի՞ է համարել Հայաստանի նոր իշխանության համար փորձություն. «Առաջին լրատվական»- ի հետ զրույցում ի պատասխան այս հարցի՝ ԱԺ «Իմ քայլը» դաշինքի պատգամավոր Միքայել Զոլյանը նշեց, որ տեղի է ունենում բնական գործընթաց. «Այստեղ որևէ ողբերգական բան չեմ տեսնում, առևտուր է, մենք գնողն ենք, Ռուսաստանը վաճառողն է, «Գազպրոմ Արմենիան» հայտնվել է մոնոպոլ ներկրողի դերում, որպես դաշնակից երկիր զեղչ չեն անում, մենք պետք է փորձենք մեզ համար առավել նպաստավոր պայմաններ ստեղծել: Բնականաբար երբ ապրանք ես գնում, փորձում ես ցածր գնով գնել:
Խնդիրը միայն գազի սակագինը չէ. սա Հայաստանի էներգետիկ անվտանգության, էներգետիկ անկախության գործընթաց է: Քաղաքական բաղադրիչն այստեղ բացառել հնարավոր չէ, բայց եթե դիտարկենք Հայաստանի վերջին 20 տարիների քաղաքականությունը, Հայաստանն ինչ քաղաքականություն էլ վարել է, ի վերջո գազի գինը բարձրացել է»:
Անդադառնալով հարցին, թե արդյոք գազի սակագնի բարձրացման հարցը Ռուսաստանի կողմից ճնշում է Հայաստանի վրա, թե ոչ, «Լուսավոր Հայաստան» կուսակցության պատգամավոր Գևորգ Գորգիսյանը նշեց, որ դա առաջիկայում կերևա. «Համենայնդեպս Ն. Փաշինյանի հայտարարությամբ՝ Հայաստանի և Ռուսաստանի հարաբերությունները երբեք այսքան լավ չեն եղել, դրանից հետո այլ հայտարարություն չի եղել, և հիմա դա գործնականում պետք է տեսնենք»:
Գորգիսյանի դիտարկմամբ՝ սահմանին գազի գնի բարձրացումն այդքան էլ մտահոգիչ չէ: Նրա կարծիքով՝ գազի գնի էժանացման հնարավորություն կա: «Եթե գազի գինը չթանկանա սպառողների համար, բայց սուբսիդավորում լինի, սուբսիդավորումն էլ է քաղաքացիների հաշվին»,- նկատեց ԼՀԿ պատգամավորը:
Նա նաև ընդգծեց, որ Հայաստանն ունի էներգետիկ անվտանգության խնդիր, և էներգետիկ անկախության հարցը պետք է դարձնել քաղաքական առաջնահերթություն, պետք է մտածել այլընտրանքային էներգետիկ աղբյուրների մասին:
Մանրամասն՝ տեսանյութում: