«Առաջին լրատվական»-ի զրուցակիցն է «Ժառանգության» փոխնախագահ Արմեն Մարտիրոսյանը:
Երկուշաբթի օրը սկսվելու է Ազգային ժողովի գարնանային նստաշրջանը, և դեռ հայտնի չէ, թե «Ժառանգություն» խմբակցության քարտուղար Թևան Պողոսյանը նորից կհայտարարի՞ մանդատը վայր դնելու մասին, թե՞ կուսակցությունում կարողացել են նրան համոզել, որ այդ քայլը չանի: Ինքը՝ պատգամավորը, հիմա չի շփվում լրագրողների հետ, չի պատասխանում հեռախոսազանգերին, իսկ «Ժառանգությունից» էլ չեն ցանկանում պարզաբանել, թե արդյոք կարողացե՞լ են համոզել նրան, որ մանդատը վայր չդնի: «Ժառանգության» փոխնախագահ Արմեն Մարտիրոսյանը մեզ հետ հեռախոսազրույցում ընդամենն ասաց, թե կուսակցությունը հունվարի 5-ին քննարկել, դրական է գնահատել Թ. Պողոսյանի գործունեությունը և նրան հորդորել է շարունակել այն, իսկ մնացածը նրա որոշելիքն է:
– Իսկ դրանից հետո այդ հարցը չե՞ք քննարկել Թ. Պողոսյանի հետ:
– Այս պահին որևէ նորություն չունենք, կարծում եմ, որ Թ. Պողոսյանն ինքն իր քայլի մասին կհայտարարի: Թևանը շատ հասուն, զարգացած անձնավորություն է, և չեմ կարծում, որ պարբերաբար պետք է համոզենք: Մենք դրական գնահատել ենք նրա գործունեությունը, մնացածն արդեն իր որոշելիքն է: Մենք, իհարկե, ուրախ կլինենք, եթե նա իր գործունեությունը շարունակի: Նրա գործունեությունը դրական է գնահատվել կուսակցության կողմից, և կարծեք թե մեր փորձագիտական շրջանակներն էլ գոհ են նրանից: Եվ եթե մարդ իր աշխատանքով դրական ձեռքբերումներ է ունենում, բնականաբար, ցանկալի է, որ նա շարունակի իր գործունեությունը:
– Եթե Թ. Պողոսյանը չհամաձայնի ու վայր դնի մանդատը, գալու է «Ազատ դեմոկրատներ» կուսակցության անդամ Մասիս Այվազյանը: Դա ձեզ չի՞ անհանգստացնում:
– Երբ որ դա կլինի, այդ ժամանակ նոր դրա հետ կապված մեկնաբանություններ կտանք:
– Իսկ որտե՞ղ է Րաֆֆի Հովհաննիսյանը, նա ակտիվ քաղաքական քայլեր չի անում:
– Պարոն Հովհաննիսյանը մասնակցեց Շանթ Հարությունյանի համար կազմակերպված հավաքին և այնտեղ լրագրողներին ասել է, որ փետրվարին խոսքով հանդես կգա:
– Ամեն դեպքում ինչո՞ւ է նա պասիվացել: Նախագահական ընտրությունների ժամանակ ձևավորված ակտիվությունը կարծես թե տարավ դեպի մարում:
– Ոչ նա, ոչ էլ որևէ մեկս մարման չտարանք: Դեպքերն այնպես զարգացան, որ մեր հասարակությունը դեռևս չէր ցանկանում ակտիվ պայքարել, ընդդիմությունն՝ առավել ևս: Եվ մենք տեսանք, որ նա ինչպես միայնակ եղել էր, այդպես էլ միայնակ շարունակեց այդ պայքարը: Այնպես որ, չեմ կարծում, թե մեր մեղքի բաժինը շատ մեծ է: Իսկ ինչ վերաբերում է ակտիվությանն ու պասիվությանը, չեմ կարծում, որ այսօր Հայաստանում ինչ-որ մեկը առավել ակտիվ է, քան «Ժառանգությունը»: Եվ որևէ մեկը ինչ-որ էքստրա արդյունավետ քայլեր է իրականացնում, ու Ր. Հովհաննիսյանն էլ պասիվ է:
– Հիմա արդեն, երբ խմբակցությունում որոշակի խնդիրներ կան, չե՞ք կարծում, որ «Ժառանգությունը» 2012թ. համամասնական ցուցակը կազմելիս սխալներ է թույլ տվել:
– Նույն կերպ մենք հիմա կարող ենք ասել, որ «Ժառանգությունը» սխալ քաղաքականություն է վարում, երբ մյուս երեք ուժերի հետ համատեղ փորձում է պարտադիր կուտակայն կենսաթոշակային համակարգի կամ գազային պայմանագրերի դեմ պայքարել: Այդ ժամանակ էլ մենք փորձում էինք միասնությունն այդ կերպ ձևավորել: Իսկ թե ինչ եղավ, կարծում եմ` բոլորդ տեսաք:
– Բայց կուսակցության համամասնական ցուցակը կազմելն ու այդ երևույթների դեմ պայքարելը տարբեր բաներ են:
– Տարբեր բաներ չեն: Մենք այդպիսով ցանկացանք որոշակի միասնություն ապահովել: Այնպես որ, ինչպես մեր բանաձևումը եղել է` կուսակցություն գումարած քաղաքացիական հասարակություն, նույն կերպ էլ մեր ցուցակն այդպես կազմեցինք «Ժառանգության» անվան ներքո: Թ. Պողոսյանն էլ հենց քաղաքացիական դաշտից էր:
– Տվյալ դեպքում «Ժառանգության» հաշվարկները սխալ ստացվեցին «Ազատ դեմոկրատներ» կուսակցության դեպքում:
– Հնարավոր է, ամեն ինչ էլ հնարավոր է: Ոչ առաջին, ոչ էլ վերջին դեպքն է, երբ համագործակցության ձևը ճիշտ չի օգտագործվում: Բայց ոչինչ, այդպես էլ է պատահում, քաղաքականության մեջ ամեն ինչ էլ պատահում է: Կարևորն այն է, որ դրա արդյունքում պետությունը հարվածներ չստացավ: Եթե հարվածներ եղել են, բացառապես «Ժառանգությունն» է ստացել: