Հանրային ուշադրության կենտրոնում շարունակում է մնալ Փաշինյան – Պուտին մոսկովյան հանդիպումը. այդ հանդիպումն ավելի շատ հարցեր ծնեց, քան թե պատասխաններ տվեց: Թեմայի շուրջ «Առաջին լրատվական»- ի հետ զրույցում միջազգայնագետ, ԱԺ նորընտիր պատգամավոր Հովհաննես Իգիթյանը նշեց, որ այն կարելի է համարել հաջողված իմիջային հանդիպում:
«Մեր բնակչությունն առաջին հերթին հետաքրքրված էր գազի գնի հարցով, բայց այդ հարցի շուրջ որոշում չկա: Իրականում խոսքը հինգ տարի առաջ ստորագրված համաձայնագրի մասին է, որի ժամկետը լրացել է, և հիմա միայն գազի սակագնի խնդիրը չէ, տեքստային փոփոխությունների հարց կա: 2013-ին ՌԴ-ի հետ ստորագրվել է 2 համաձայնագիր, մեկով մինչև 2043թ. որպես սեփականություն ՌԴ-ին է տրված մեր ամբողջ գազամատակարարման ցանցը և տրված է խոստում, որ Հայաստանը միայն Ռուսաստանից է գազ գնելու: Մյուս համաձայնագիրը 5 տարով է կնքվել, որտեղ ֆիքսված է գազի այդ ժամանակահատվածի գրեթե անփոփոխ սակագինը: Մենք դեռ այն ժամանակ ահազանգել ենք և հայտարարություններ արել այն մասին, թե ինչպես կարելի է հիմնական լծակը տալ ՌԴ-ին: Այնուամենայնիվ ԵԱՏՄ շրջանակներում Ռուսաստանն ունի բոլոր անդամ երկրների հանդեպ պարտավորություններ և պետք է առաջնորդվի մեկ ընդհանուր բանաձևով, ինչի շնորհիվ գազի սակագինն առնվազն կպահպանվի: Ենթադրում եմ, որ այդ հարցի շուրջ որոշումը հետաձգվել է»,- նշեց Հ. Իգիթյանը:
Նրա դիտարկմամբ՝ հայ – ռուսական հարաբերություններում իրավիճակը ճգնաժամային չէ, բայց որոշ հարցերում կան տարբեր մոտեցումներ և քննարկման խնդիրներ:
«Ինչու է Վլադիմիր Պուտինը սիրում Ռոբերտ Քոչարյանին, նրան իր ընկերը համարում և շնորհավորական բացիկ ուղարկում անգամ երբ նա բանտում է. դա արվում է, քանի որ Ռուսաստանին առաջին և անհեթեթ նվերն արել է Ռ. Քոչարյանը՝ «գույք պարտքի դիմաց» նախաձեռնությամբ, հենց դրանից հետո սկսվեց Ռուսաստանի մենաշնորհը, միայն «Հրազդան ՋԷԿ»- ն արտադրում է մեր՝ 100 մլն պարտքից 3-4 անգամ ավել էլեկտրաէներգիա:
Հետագայում Սերժ Սարգսյանն էլ էր նվերներ տալիս ՌԴ-ին: 12 տարի դեռ ժամանակ կար, բայց նա ռուսական ռազմաբազայի ժամկետը երկարացրել է մինչև 2049թ: Այսօր իրավիճակ է փոխվել, մենք պետք է Ռուսաստանի հետ քննարկենք ռազմաբազայի ժամկետի հարցը»,- նշեց Իգիթյանը:
Նա նաև ընդգծեց, որ Ռ. Քոչարյանն իր վերջերս հրատարակած գրքում կեղծում է իրականությունը: Միջազգայնագետի խոսքով՝ նրա գրքում կան դրվագներ՝ կապված ղարաբաղյան շարժման հետ, իսկ այդ շարժմանը մասնակիցները դեռ ողջ են և նրանք կարդում են ու ծիծաղում, քանի որ անհեթեթ մտքեր է արտահայտում:
«Ռ. Քոչարյանի համար Հայաստանը եղել է միայն փող աշխատելու և իր ինքնասիրությունը բավարարելու միջոց, և գնացել է ՌԴ՝ այնտեղ և աշխարհում ծախսելու իր գումարները: Պուտինը, հանձին Քոչարյանի, տեսնում է Ռուսաստանի պատրիոտին, ոչ թե Հայաստանի շահերը պաշտպանող մարդու»,- ընդգծեց մերզրուցակիցը:
Մանրամասն՝ տեսանյութում: