Կրեմլի մամուլի ծառայությունը հաղորդագրություն է տարածել այսօր Մոսկվայում կայանալիք Փաշինյան-Պուտին հանդիպման մասին, ասելով, որ կքննարկվեն երկկողմ օրակարգի հանգուցային թեմաները, ինչպես նաև զարգացման հեռանկարներն ու եվրասիական տարածքում գործակցության հարցերը: Որոնք են հայ-ռուսական երկկողմ օրակարգի հանգուցային թեմաները, Կրեմլի մամուլի ծառայությունը չի մանրամասնում, սակայն հանգուցային բնորոշումը ինքնին արդեն իսկ բավականին խոսուն է և, թերևս, նույնիսկ հայ-ռուսական բարձր մակարդակի հանդիպումների համար աննախադեպ: Մյուս կողմից, հայ-ռուսական հարաբերության բարդ հանգույցները ամենևին թավշյա հեղափոխությունից հետո չէ, որ ձևավորվել են: Պարզապես այդ հանգույցները մինչև թավշյա հեղափոխությունը լռության էին մատնվում, ելնելով նախկին համակարգի բնույթից, ըստ այդմ՝ հարցեր լուծելու կամ չլուծելու մեթոդաբանությունից:
Երբ Հայաստանում փոխվում է համակարգի բնույթը և ձևավորվում, կամ դրվում լեգիտիմ իշխանության ու քաղաքական պրոցեսի, օրինական և իրավական հանրային կյանքի հիմքեր, այդ իրողությունը անխուսափելիորեն բերելու է հարաբերությունների վերանայման խնդրի՝ ընդհուպ արտաքին հարցեր: Եվ այստեղ բանը միայն Ռուսաստանը չէ, կամ եվրասիական տարածությունը չէ: Պարզապես Հայաստանի նախկին համակարգի բնույթից բխող արտաքին հարաբերությունները ներդաշնակ էին եվրասիական ուղղությամբ՝ բնույթների համահունչ լինելու բերումով, իսկ այլ ուղղություններում հիմնականում խնդրահարույց կամ, այսպես ասած, հանգուցային: Երբ Հայաստանի ներսում փոխվում է տրամաբանությունը, ինքնաբերաբար քանդվում են մեծ կամ փոքր հանգույցները այն ուղղությունների վրա, որտեղ Հայաստանի գործընկերները իրավական, ժողովրդավարական սկզբունքներով կառավարվող պետություններ են: Իսկ ահա այն ուղղությունների վրա, որտեղ կառավարումը Հայաստանի նախկին իշխող համակարգի բնույթին էր համահունչ, բնականաբար առաջանում, կամ պարզապես տեսանելի և զգալի են դառնում հանգույցները: Ըստ այդմ՝ այստեղ բուն խնդիրը այն չէ, որ դրանք առաջացել են՝ դրանք եղել են, դարձել են տեսանելի ու զգալի, և հիմա բուն խնդիրը հենց այդ հանգույցները այնպես հաղթահարելն է, որ հարաբերությունը չվնասվի, այլ առողջանա: Սա է իրական խնդիրը և գործնականում ազդարարումը, որ կան հանգուցային խնդիրներ, կարող է նշանակել նաև հայ-ռուսական հարաբերության հարցում բարձր մակարդակի նոր երկխոսության որոշակի մեկնարկի ազդարարում:
Ընդ որում, դրա մասին ակնարկել էր նաև ՌԴ նախագահ Պուտինը օրերս մեծ ասուլիսի ընթացքում՝ հայտարարելով, որ Հայաստանի հետ հարաբերությունները չեն փլուզվել, որ լինի վերականգնման կարիք, այլ դրանք պետք է զարգացնել՝ նոր իրողություններ հաշվի առնելով: Եվ այս իմաստով, անկասկած է, որ այսօր տեղի ունենալիք հանդիպումից Հայաստանի հասարակությունը սպասում է որոշակի հարցերի պատասխաններ, իհարկե գազի գնի, ՀԱՊԿ շուրջ ստեղծված իրավիճակի մասով, սակայն Կրեմլի մամուլի ծառայության հաղորդագրությունը հուշում է նաև, որ դեկտեմբերի 27-ին գործնականում տրվում է հայ-ռուսական հարաբերության ճշգրտման գործընթացի որակի մեկնարկ, իհարկե, բոլորովին ոչ ֆորմալ գործընթացի, սակայն բավական ժամանակատար ու աշխատատար, և այստեղ արդեն հարցն այն է, թե որքան արդյունավետ է լինելու այդ գործընթացում Հայաստանի նոր իշխանությունը կամ նոր Հայաստանը:
