Մոտենում են ամանորյա տոները և արդյունքում որոշ ապրանքատեսակներ շոշափելի թանկացել են։ Ամեն տարի տոների նախօրեին մեզ մոտ թանկացումներ են գրանցվում, արդյո՞ք սա օրինաչափ է և պայմանավորված է առաջարկ ու պահանջարկ հարաբերակցությամբ, թե՞ կան սպեկուլյատիվ տենդենցներ «Առաջին լրատվական»-ի հարցին «Իրազեկ և պաշտպանված սպառող» հ/կ նախագահ Բաբկեն Պիպոյանը պատասխանեց․ «Սպեկուլյատիվ տենդեցն էլ է գալիս առաջարկ-պահանջարկ հարաբերակցությունից։ Խնդիրն այն է, որ մենք շատ հաճախ լսում ենք մի բան, բայց տեսնում ենք մեկ այլ բան։ Քաղաքացին գիտի մի բան, ու իրեն մտահոգում է միայն մի բան՝ ինքը խանութում տեսավ ավելի թանկ, ինքը խանութում տեսավ ավելի էժան։ Քաղաքացուն հետաքրքիր չի, թե վաճառողը, օրինակ, միսը գյուղացուց ձեռք է բերել ավելի թանկ, ավելի էժան, թե նույն գնով։ Իրեն հետաքրքիր է, թե ինքը փաստացի որքան վճարեց ապրանքի դիմաց վաճառողին»։
«Գնաճ ունենք շուկայում, թե չէ, իրականում դիտարկում ենք մթերման գնի մասով փոփոխություն կա՞, թե՞ չկա։ Եվ եթե վերցնենք մթերման գնով, ապա, օրինակ, տավարի մասով մթերվում է նույն գնով, ինչ նախկինում։ Կովի միսը մթերվում է մոտավորապես 2200-2300 դրամով, իսկ բտված ցլի միսը՝ 2600-2700 դրամի շրջանակներում է տատանվում։ Իսկ իրացման ցանցում մենք տեսնում ենք գնային էական տարբերություններ»,- հավելեց բանախոսը։
Բաբկեն Պիպոյանը նաև ասաց, որ իրացման ցանցում ավելանում է փափուկ մսի պահանջարկը և, բնականաբար, դժվար է իրացվում ոսկորով միսը ու ինչ-որ չափով ոսկորով միսը նույնիսկ վաճառվում է ավելի էժան, քան նախկինում։
Ամբողջությամբ՝ տեսանյութում։
