Իրանի ԱԳ փոխնախարար Աբաս Արաքչին հայտարարել է, որ Իրանը միջուկային գործարքի մեջ կմնա, քանի դեռ այն օգուտներ է բերում, բայց դրանք ավելի ու ավելի են պակասում՝ գրում է RIA Novosti-ն:
«Մենք ԳՀՀԾ-ում (իրանական միջուկային ծրագրի վերաբերյալ Գործողությունների համատեղ համապարփակ ծրագիր) կմնանք այնքան ժամանակ, քանի դեռ դա շահավետ է մեզ համար, սակայն իրականում Իրանի տնտեսական շահերը գնալով ավելի ու ավելի են պակասում: Մենք անհրաժեշտ որոշում կընդունենք, երբ ժամանակը գա»,- հայտնել է Արաքչին:
Նա հավելել է, որ ԱՄՆ-ը քաղաքական մեկուսացման մեջ է հայտնվել միջուկային գործարքից դուրս գալու պատճառով: ԱՄՆ նախագահ Դոնալդ Թրամփը մայիսին հայտարարել է, որ Վաշինգտոնը դուրս է գալիս Իրանի հետ միջուկային ծրագրի վերաբերալ համաձայնագրից: Նա նաև հայտնել է այս երկրի դեմ բոլոր պատժամիջոցները վերականգնելու մասին, այդ թվում՝ երկրորդային, այսինքն՝ մյուս այն երկրների նկատմամբ, որոնք Իրանի հետ համատեղ բիզնես ունեն:
