Գերմանիայի իշխանությունները փոխհատուցում կվճարեն հրեաներին, որոնք տարհանվել են նացիստական Գերմանիայից մանուկ հասակում, հաղորդում է Associated Press-ը՝ վկայակոչելով «Քլեյմս Կոնֆերենս» կազմակերպությանը, որը բանակցություններ է վարել գերմանական կառավարության կողմից փոխհատուցումների վճարման հարցով:
Փոխհատուցման գումարը կկազմի 2.5 հազար եվրո, որը կստանան Երկրորդ համաշխարհային պատերազմից առաջ Գերմանիայից, Ավստրիայից, Չեխոսլովակիայից, Լեհաստանից Մեծ Բրիտանիա տարհանված բոլոր հրեաները:
Kindertransport օպերացիայի շրջանակում այն ժամանակ տարհանել են 10 հազար երեխա, որոնցից այսօր կենդանի է մոտ հազարը: Նրանցից շատերը այլևս չեն տեսել իրենց ծնողներին, պարզաբանում է AP-: Վերապրածներից մոտ կեսը մինչ այժմ ապրում է Մեծ Բրիտանիայում:
Փոխհատուցման վճարումը դիտվում է որպես «նրանց տառապանքի խորհրդանշական ճանաչում»,- հայտարարել է «Քլեյմս Կոնֆերենս» կազմակերպության նախագահ Գրեգ Շնայդերը: «Նրանցից գրեթե բոլորի ծնողները սպանվել են հոլոքոստի ժամանակ համակենտրոնացման ճամբարներում, այժմ նրանք հոգեբանական խնդիրներ ունեն»,- ավելացրել է նա:
