Ըստ diken.com.tr կայքի, Սիրիայի տարածքում կռվող քրդական զինված խմբավորումները հայտարարել են, որ պատրաստ են համագործակցել Սիրիայի նախագահ Բաշար ալ Ասադի ռեժիմի հետ, թուրքական ԶՈւ-ի դեմ հնարավոր նոր մարտերում:
Սիրիայի հյուսիսում քրդական ազգային զինված ջոկատների գլխավոր հրամանատար Սիփան Հեմոն կոչ է արել Սիրիայի իշխանություններին պաշտպանել երկրի տարածքային ամբողջականությունը և հավելել, որ, չնայած առկա տարաձայնություններին, իրենք պատրաստ են համագործակցության:
«Սիրիայի դեմոկրատական ուժեր» քրդամետ խմբավորման հրամանատարներից Մազլում Քոբանին նշել է, որ իրենք պատրաստ են համարժեք պատասխան տալ թուրքական ԶՈւ-ին:
Ավելի վաղ Թուրքիայի նախագահ Ռեջեփ Թայիփ Էրդողանը հայտարարել է, որ ընդամենը մի քանի օրից թուրքական ԶՈւ-ն կգրոհի սիրիական Մանբիջը, որտեղ գտնվում են սիրիացի քուրդ զինյալների դիրքերը:
ԱՄՆ Պենտագոնը կոչ է արել Թուրքիային խուսափել նման գործողությունից՝ հիշեցնելով, որ նույն տարածքում գործում են նաև ամերիկացի զինվորականներ:
