Չնայած Արցախից եկած պաշտոնական հերքումներին, թե Արցախի Հանրապետության պաշտպանության բանակի հրամանատար, գեներալ-լեյտենանտ Լևոն Մնացականյանն աշխատանքից ազատվելու դիմում չի գրել, այնուամենայնիվ, մամուլում շրջանառվում են լուրեր, որ առաջիկա ժամերի ընթացքում Լևոն Մնացականյանը հրաժարական կտա։ Խոսակցություններ կան, որ իրենց պաշտոններին հրաժեշտ կտան նաև ԱԱԽ քարտուղար Վիտալի Բալասանյանը և նախագահի խորհրդական Արշավիր Ղարամյանը։
Արցախի խորհրդարանի «Ազատ հայրենիք» կուսակցության պատգամավոր Ռուդիկ Հյուսնունցը, «Առաջին լրատվական»-ի հետ զրույցում անդրադառնալով շրջանառվող լուրերին, նշեց, որ այդ լուրերը ասեկոսեների մակարդակում են։ «Որևէ պաշտոնական տեղեկատվության մենք չենք տիրապետում, իսկ մեր երեք գեներալների միասին ես միայն մեկ բան կարող եմ ասել՝ այդ մարդիկ վաստակ ունեցող մարդիկ են, և նմանատիպ խոսակցությունները կարող են խարխլել թե՛ միասնականությունը, թե՛ բանակաշինության հիմքերը, և կարծում եմ՝ նմանատիպ խոսակցությունները պետք է դադարեն, քաղաքական որոշումները կայացնում են քաղաքական իշխանության՝ Արցախի և Հայաստանի Հանրապետությունների Գերագույն գլխավոր հրամանատարները»,- ասաց Արցախի պատգամավորը։
Լևոն Մնացականյանը, Վիտալի Բալասանյանը, նախագահի խորհրդական Արշավիր Ղարամյանը, նրա խոսքերով, բացառիկ արժեքներ են Արցախի ժողովրդի համար, ովքեր կանգնած էին բանակաշինության հիմքում և այսօր էլ իրենց առաքելությունն են կատարում։ Նրա խոսքերով՝ նրանց իրավասությունները տեղաշարժելը, որևէ մեկին որևէ պաշտոնում տեղափոխելը երկու նախագահների, այդ թվում՝ ՀՀ վարչապետի և Արցախի նախագահի իրավասությունների մեջ է մտնում։
Շրջանառվող լուրերին, թե հեղափոխությունը հասավ Արցախ, Ռուդիկ Հյուսնունցը չհամաձայնվեց, նշեց, որ ունի այլ տեղեկություններ, որ ՀՀ նորընտիր վարչապետ Նիկոլ Փաշինյանն անվերապահորեն սատարում է Արցախի իշխանություններին, և կարծում եմ՝ այդ պաշտոնական հայտարարությունից հետո մնացած բոլոր բարձրացված հիվանդագին երևույթները ուղղակի երևակայության շրջանակներից են և ինչ-որ մարդկանց շահեկան դիրքերից, ովքեր ուզում են իրականում ճանաչելիություն ստանան, ովքեր ուզում են հետագայում քաղաքական օրակարգ մտնել՝ թե՛ կուսակցությունների, թե՛ անհատ քաղաքական գործիչների տեսքով։ «Համենայնդեպս, դրական միտումներ չեն այս ամենը, որ կան մեր քաղաքական համակարգում»,- ասաց պատգամավորը։
Նա նաև նշեց, որ այսօր մեզ կայունություն է պետք, մանավանդ մեր բանակին, ներքաղաքական կյանքում մենք պետք է ունենանք ուրիշ Հայաստան, և Արցախի լուսապայծառ ապագան, մասնավորապես, կախված է Հայաստանից․«Համոզված եմ, որ մեր ներքին կայունությունը պետք է պահպանվի և համոզված եմ, որ պահպանվելու է, որովհետև Հայաստանում արձանագրված բոլոր հաջողություններից է կախված Արցախի ապագան, հետագայում Արցախի բոլոր խնդիրները»։
Արցախի Հանրապետության «Ազգային վերածնունդ» կուսակցության նախագահ Հայկ Խանումյանը, «Առաջին լրատվական»-ի հետ զրույցում անդրադառնալով հնարավոր հրաժարականներին, նշեց, որ բացի սոցցանցերում և լրատվամիջոցներում առկա տեղեկատվությանը, ինքը այլ տեղեկատվության չի տիրապետում։ Թեև այսօր ԱԺ նիստ է եղել, սակայն այդ թեմայով քննարկում չի եղել, հիմնականում բյուջեն են քննարկել։
Այնուամենայնիվ, պատգամավորը նորմալ է դիտարկում այս փոփոխությունները, նշում, որ բանակում ռոտացիան նորմալ երևույթ է, և առաջին անգամ չէ, որ պաշտպանության բանակի բարձրաստիճան զինվորականների տեղափոխում են կամ թոշակի են ուղարկում։
«Պաշտպանության բանակից բազմիցս տարբեր զինվորականներ, կորպուսի հրամանատարներ, վարչության պետեր, գլխավոր շտաբի բաժնի պետեր, ԳՇ պետ, ԳՇ պետի տեղակալ եկել են Հայաստան, պաշտպանության փոխնախարարներ են եղել Արցախից։ Նորմալ երևույթ է։ Այստեղ էլ, իհարկե, զինվորականներ կան պաշտպանության բանակի հրամանատարի տեղակալի մակարդակով, դիվիզիայի բրիգադի գնդի հրամանատարների մակարդակով, որոնք կարիք ունեն առաջխաղացման, տեղափոխությունների։ Մի խոսքով, բանակն այնպիսի վայր է, որ չի կարելի թողնել մարդիկ լճանան այնտեղ»,- ասաց Հայկ Խանումյանը։
Հարցին՝ հնարավոր է հեղափոխությունը հասնում է Արցախ, պատգամավորը նկատեց, որ հունիսին Արցախում սկսվել էին պրոցեսներ ուժային կառույցների ղեկավարների դեմ խոշտանգումների հետ կապված դեպքերով, հիմա դժգոհությունները մնացել են, իսկ վերջնական փոփոխություն 20 թվականի ընտրություններով կլինի։
