Երևանի ընդհանուր իրավասության դատարանի՝ Կենտրոն վարչական շրջանի տարածքում գտնվող նստավայրում Արմեն Բեկթաշյանի նախագահությամբ դարձյալ հետաձգվեց Նորք-Մարաշի զինված խմբի գործով դատական քննությունը՝ ըստ մեղադրանքի՝ «ՀՀ իշխանությունը յուրացնելու, զավթելու նպատակով ստեղծված հանցավոր համագործակցության» 20 անդամների՝ Արթուր Վարդանյանի,Վահան Շիրխանյանի, Անտոն Դիկրան Թոթոնջյանի, Գառնիկ Մարգարյանի, Վլադիմիր Առաքելյանի, Խաչիկ Ավետիսյանի, Ավետիս Բարեյանի, Վաղինակ Ստեփանյանի, Արթուր Եղիազարյանի, Վահագն Սալնազարյանի, Արման Հայրապետյանի, Էդվարդ Ներսիսյանի, Հարություն Սարիբեկյանի, Արա Պողոսյանի, Տիգրան Բոյաջյանի, Գևորգ Ջնդոյանի, Արկադի Մարդոյանի, Ասյա Մկրտչյանի, Մարինե Կաթանյանի, Նելլի Մինասյանի վերաբերյալ:
Այս գործով կալանքի տակ մնացել է միայն մեկ ամբաստանյալ՝ խմբի անդամներ ու զենք հավաքագրող և խմբի պարագլուխ համարվող Արթուր Վարդանյանը:
Մնացած ամբաստանյալներն ազատության մեջ են:
Այս գործի դատական քննության փակուղային վիճակը շարունակվում է: Որոշ ամբաստանյալներ գործի տևական քննության ընթացքում երևի հասցրել են «հոգնել» իրենց շահերի պաշտպաններից: Հիմա պաշտպաններից համատարած «հրաժարումների» շարք է սկսվել, և պաշտպանից յուրաքանչյուր հրաժարումին հետևում է հանրային պաշտպանի գրասենյակից նոր փաստաբանի հրավիրումը, ինչը հերթական անգամ հանգեցնում է դատական քննության հետաձգման, քանի որ նոր ներգրավված պաշտպանը գոնե ինչ-որ չափով պիտի ծանոթանա այս ծավալուն գործին:
Քանի որ այս գործով ամբաստանյալների միջև կա շահերի հակասություն՝ օրենքի պահանջով՝ նրանք բոլորը պետք է ունենան պաշտպաններ: Եվ ահա՝ պաշտպանափոխության գործընթացը այս գործը նետել է անվերջ հետաձգումների ճիրանների մեջ…
Եվ այսպես՝ նախորդ նիստերից մեկում իրենց պաշտպաններ Ինեսա Պետրոսյանից ու Նարինե Ռշտունուց հրաժարվել էին համապատասխանաբար՝ ամբաստանյալներ Նելլի Մինասյանն ու Հարություն Սարիբեկյանը: Ընդ որում՝ վերջինս այս գործով արդեն ռեկորդ է սահմանում իր շահերը պաշտպանողներից հրաժարվելու առումով:
Պաշտպաններից հրաժարված վերոհիշյալ ամբաստանյալների շահերը ներկայացնելու համար ներգրավվեցին հանրային պաշտպանի գրասենյակի փաստաբաններ Անյուտա Մկրտչյանն ու Արա Սարգսյանը: Պաշտպանները ժամանակ խնդրեցին քրեական գործին ծանոթանալու համար:
Բայց անակնկալները շարունակվում են: Իրենց շահերի պաշտպան, փաստաբան Ինեսա Պետրոսյանի ծառայությունից հրաժարվեցին նաև նրա մյուս երկու պաշտպանյալները՝ Մարինե Կաթանյանն ու Ասյա Մկրտչյանը: Ինեսա Պետրոսյանն այս գործի քննությանն այլևս չի մասնակցի՝ որպես պաշտպան: Իսկ նրա նախկին պաշտպանյալների համար հաջորդ նիստին հանրային պաշտպանի գրասենյակից պաշտպաններ կներգրավվեն, ու վերջիններս էլ, բնականաբար, ժամանակ կխնդրեն քրեական գործին ծանոթանալու համար…
Եվ այսպես՝ այս տարի տվյալ գործի «սայլը» կմնա կանգնած այնտեղ, որտեղ անշարժ կանգնած է արդեն տևական ժամանակ: Եկող տարին առաջին ատյանի դատարանում այս գործի դատական քննության «ավարտական զանգի ղողանջին» կհանգեցնի՞ տեսնես: Եթե ամեն ինչ ընթանա այնպես, ինչպես ընթանում է, դժվար թե…
