Ազգային ժողովը 2013թ. միայն հոկտեմբեր-դեկտեմբեր ամիսներին պատվիրակությունների հյուրասիրության համար ծախսել է մոտ 11 միլիոն 546 հազար դրամ կամ մոտ 28 հազար 200 դոլար:
Այդ հյուրասիրություններից հատկապես երկուսը բավականին թանկարժեք են: Օրինակ` հոկտեմբերի 24-ին «Իվենթ Սոլաշընգ ընդ ինսենթիվս» ընկերության հետ կնքած պայմանագրի համաձայն ԱԺ-ն պատվիրակությունների հյուրասիրության համար վճարել է 5,4 մլն դրամ: Նույն օրը նույն ընկերությանը նույն նպատակով վճարել է ևս 1 մլն 168 հազար դրամ:
ԱԺ-ի կնքած պայմանագրերի համաձայն` այդ հյուրասիրությունները շատ հաճախ կազմակերպվում են Հրազդանի կիրճում գտնվող «Ֆլորենս» ռեստորանային համալիրում, որը, հիշեցնենք, պատկանում է «ՀայՌուսգազարդի» նախկին տնօրեն և Երևանի նախկին քաղաքապետ Կարեն Կարապետյանին: Իսկ այդ ռեստորանում հյուրասիրությունների կամ ծառայությունների գները գրեթե ամենաթանկն են այս ոլորտում: Եվ ԱԺ-ն, փաստորեն, հենց նման օբյեկտներում է իր պատվիրակության համար ճոխ հյուրասիրություններ կազմակերպում:
Նույն ժամանակաընթացքում ԱԺ-ն ներկայացուցչական ծախսերի տողով նույնպես հյուրասիրություններ է կազմակերպել այլ օբյեկտներում, և դրանց գումարը ներառված չէ վերը նշված թվի մեջ:
Կառավարության կայքում բյուջետային ծախսերի բաժինն ուսումնասիրելիս պարզ է դառնում, որ ընդհանրապես ՀՀ պաշտոնյաները կամ գերատեսչությունների ղեկավարներն իրենց հյուրերին «պատիվ են տալիս» Երևանի հայտնի և շատ թանկարժեք այնպիսի ռեստորաններում, ինչպիսիք են «Դոլմաման», նույն «Ֆլորենսը», «Նոյան տապանը» և այլն:
Իրենց հյուրերի համար երբեմն «Դոլմամայում» են հյուրասիրություններ կազմակերպում նաև նախագահականն ու Արտաքին գործերի նախարարությունը: Այդ ռեստորանում են հյուրասիրել, օրինակ, Թուրքիայի նախագահ Աբդուլլահ Գյուլին կամ Անգլիայի արքայազն Չարլզին: Մեր նախագահներն այնտեղ են պատիվ տվել Հայաստան այցելած Ֆրանսիայի բոլոր նախկին նախագահներին՝ Ժակ Շիրակին, Նիկոլա Սարկոզիին: Հավանաբար գարնանն այնտեղ կհյուրասիրեն նաև Ֆրանսուա Օլանդին:
«Դոլմամա» ռեստորանը գտնվում է Պուշկին փողոցի Աբովյան-Նալբանդյան հատվածում, արտաքինից շատ անշուք մի շենքում: Ասում են` այն հայտնի է հատկապես իր տոլմայով, որն էլ սիրում են ճաշակել կամ իրենց հյուրերին հյուրասիրել մեր պաշտոնյաները: Օրինակ` այդ ռեստորանում ընդամենը 6 հատ տոլման արժի 7000 դրամ, որով, հասկանալի է, կշտանալ չի լինում և անհրաժեշտ է լինում ևս մեկ կամ երկու բաժին պատվիրել:
Ընդ որում` մեր պաշտոնյաներն այդտեղ սիրում են նաև հաճախ կազմակերպել իրենց փոքր ճաշկերույթները: Մի քանի ժամ ռեստորանի այցելություններին հետևելիս կարելի է բացահայտել, թե քանի պաշտոնյա կամ որ պաշտոնյաները այցելեցին այնտեղ: Իսկ այդ մասնավոր այցելությունները, բնականաբար, բյուջեում չեն արտացոլվում: Չնայած չի բացառվում, որ դրանք էլ վճարվում են բյուջեից, բայց «ատկատից» կամ ստվերային այլ ճանապարհով ձեռք բերված փողերով, հակառակ դեպքում այդ պաշտոնյաների 200-250 հազար դրամ աշխատավարձը չի բավարարի «Դոլմամայում» ընդամենը մեկ անգամ մի քանի հոգու ճաշի համար վճարելուն:
Իր նախագահության տարիներին «Դոլմամա» էր հաճախ այցելում նաև Ռոբերտ Քոչարյանը: Վերջինիս այցելությունից ժամեր առաջ նրա անվտանգության ծառայությունը մեքենաներից մաքրում էր այդ փողոցը և մի քանի ժամ շարունակ հարակից շենքերի բնակիչներին պահում ահուսարսափի մեջ:
Լուսանկարը՝ Mediamax.am-ի
