ԱՄՆ իշխանությունները կոչ են անում Ուկրաինայում ձևավորել եվրոպամետ կառավարություն՝ հունվարի 16-ի օրենքները չեղյալ հայտարարելու առաջընթացից հետո: Այս մասին հայտարարել է ԱՄՆ փոխնախագահ Ջո Բայդենը Ուկրաինայի նախագահ Վիկտոր Յանուկովիչի հետ զրույցի ընթացքում՝ հաղորդում է Ria Novosti-ն:
«Փոխնախագահը ողջունել է ձեռք բերած առաջընթացը և նախագահ Յանուկովիչին կոչ արել անհապաղ ստորագրել հունվարի 16-ին ընդունված որոշ օրենքներ չեղյալ հայտարարելու խորհրդարանի որոշումը»,- նշվում է Սպիտակ տան հաղորդագրության մեջ:
Բայդենը Յանուկովիչին նաև կոչ է արել աշխատել ընդդիմության հետ՝ գտնելու համար փոխզիջում և հակամարտության խաղաղ կարգավորման ուղիներ:
«Դրանում ներառվում են համաներման մասին օրենքը և նոր կառավարության ստեղծումը, որը կարող է հասնել քաղաքական միասնության, արժանանալ ուկրաինացի ժողովրդի վստահությանը և Ուկրաինան տանել եվրոպական ուղով՝ ամրապնդելով ժողովրդավարական կառույցներն ու անցկացնելով տնտեսական բարգավաճման համար անհրաժեշտ բարեփոխումները»,- եզրափակել են Սպիտակ տանը:
