Եվրասիական տնտեսական միության դատարանը կարևորագույն որոշում է ընդունել, որը շրջադարձային կարող է լինել հայկական ֆուտբոլի և մասնավորապես Հայաստանի ազգային հավաքականի համար: «ԵԱՏՄ-ի համաձայնության 2-րդ հոդվածի 97-րդ կետի հիման վրա դատարանը որոշել է Եվրասիական միության երկրների մարզիկների նկատմամբ սահմանափակումներ չկիրառել, որպեսզի պահպանվի համընդհանուր շուկայի ազատ կիրառման հնարավորությունը»,- նշված է պաշտոնական հայտարարության մեջ:
Վճռում նշվում է նաև, որ այս կետի չկիրառումը արգելք է հանդիսանում ԵԱՏՄ ներսում միասնական շուկա ստեղծելու համար: ԵԱՏՄ Մեծ կոլեգիայի կարծիքով՝ անդամ երկրները պետք է կատարեն Եվրոպական տնտեսական հանձնաժողովի որոշումները, իսկ դրանց հանդեպ անհամաձայնության դեպքում սահմանված կարգով վիճարկեն դրանք: Բացառություն են կազմելու միայն ազգային անվտանգության և հասարակական կարգի ապահովման համար սահմանափակումները:
Նշենք, որ ռուսական ֆուտբոլում առկա է լեգեոներների սահմանափակում, որն ազդում էր նաև ԵԱՏՄ անդամ երկրների քաղաքացիների վրա: Ռուսաստանի Պրեմիեր լիգայում լեգեոներներ են համարվում այն ֆուտբոլիստները, որոնք իրավունք չունեն հանդես գալու Ռուսաստանի ազգային հավաքականում: Սահմանափակման համաձայն՝ խաղադաշտում միաժամանակ չի կարող լինել 6-ից ավելի լեգեոներ: Սրա հետևանքով Ռուսաստանի քաղաքացիություն ունեցող բազմաթիվ հայ ֆուտբոլիստներ տարիներ շարունակ հրաժարվել են հանդես գալ Հայաստանի ազգային հավաքականում, որպեսզի իրենց ակումբներում խնդիրներ չունենան:
Մի քանի տարի Հայաստանի ֆուտբոլի ֆեդերացիան բանակցություններ էր վարում դարպասապահ Դավիթ Յուրչենկոյի հետ, որը առկա խնդրի պատճառով այդպես էլ չխաղաց մեր ազգային թիմում: Հայաստանի ազգային հավաքական էր հրավիրվել նաև այժմ «Ուֆայում» ելույթ ունեցող պաշտպան Խորեն Բայրամյանը, որը ևս, չցանկանալով ռիսկի դիմել, մերժեց հրավերը:
Այս տարի հայկական ֆուտբոլի ղեկավարները սպասում էին, որ Ռուսաստանում փոփոխության կենթարկվի լեգեոներների սահմանափակման մասին օրենքը, որը կհեշտացնի ֆուտբոլիստներին ազգային հավաքականում ներգրավելու գործընթացը: Ամռանը աշխարհի առաջնությունից հետո, սակայն, պարզ դարձավ, որ Ռուսաստանի ֆուտբոլային գերատեսչությունը մտադիր չէ փոփոխել սահմանափակման մասին օրենքը: Լեգեոներների սահմանափակումը, ըստ ռուսական կողմի, ուժեղ հավաքականներ և որակյալ կադրեր ունենալու հիմնական գրավականն է:
ԵԱՏՄ-ի դատարանի ընդունած որոշումը, կարծում ենք, չի կարող խաթարել ռուսական ֆուտբոլի բնականոն զարգացումը: Հիշեցնենք, որ բացի Ռուսաստանից՝ ԵԱՏՄ-ի անդամ են նաև Բելառուսը, Հայաստանը, Ղազախստանը, Տաջիկստանը և Ղրղըզստանը: Հաշվի առնելով նշված երկրներում ֆուտբոլի մակարդակը՝ կարող ենք ասել, որ Ռուսաստանի առաջնությունում որոշակի արտոնություն կարող են ստանալ հայ և բելառուս ֆուտբոլիստները: Մյուս երկրներն այսօր ուղղակի չունեն ֆուտբոլիստներ, որոնց խաղամակարդակը թույլ կտա խաղալու Ռուսաստանի Պրեմիեր լիգայում: Շատ չեն նաև հայ և բելառուս ֆուտբոլիստները, որոնք ունեն Ռուսաստանի քաղաքացիություն և խաղում են Պրեմիեր լիգայում:
Բացի այն, որ Ռուսաստանի քաղաքացիություն ունեցող ֆուտբոլիստները չէին միանում Հայաստանի ազգային հավաքականում, լեգեոներների սահմանափակման մասին օրենքը բացասական նշանակություն ուներ մեզ համար նաև այլ տեսանկյունից: Մասնավորապես, սահմանափակման հետևանքով ըստ էության կանգ առավ հայաստանցի ֆուտբոլիստների հոսքը Ռուսաստանի առաջնություն: Մասնավորապես, ռուսական ակումբները նախընտրում են ձեռք բերել թեկուզ ավելի թանկ, բայց ավելի բարձր կարգ ունցող ֆուտբոլիստների, և գործող լիմիտը լրացնում էին նրանցով: Ժամանակին ռուսական ակումբները հետաքրքրված էին Հայաստանում հանդես եկող ֆուտբոլիստներով: Ու հիմա, եթե հայաստանցի մարզիկը ռուսական ֆուտբոլում չունենա լեգեոների կարգավիճակ, կբացվի նոր հորիզոն: Ենթադրվում է, որ ռուսական ակումբներն իրենց հերթին ուշադրությունը կսևեռեն հայաստանցի և բելառուս ֆուտբոլիստների վրա:
Վերջին տարիներին ավելի բարձրակարգ ակումբներ ֆուտբոլիստներ «արտահանելը» բավական լուրջ խնդիր է մեզ համար: Հուսանք, որ ԵԱՏՄ-ի դատարանի որոշումը որոշակիորեն զարկ կտա այս գործընթացին: Հուսանք նաև, որ Եվրո-2020-ի ընտրական փուլին ընդառաջ՝ այս որոշման արդյունքում Հայաստանի ազգային հավաքականը զգալիորեն կլուծի կադրային խնդիրը: Միայն Յուրչենկոյի և Բայրամյանի՝ Հայաստանի հավաքականում ներգրավելը լուրջ խթան կհանդիսանա մարտունակ կոլեկտիվ ձևավորելու հարցում: Ռուսաստանում կան էլի մի քանի հայ խաղացողներ որոնք կարող են օգտակար լինել մեր ազգային թիմին:
Ռուսաստանի ֆուտբոլի միությունը որևէ կերպ չի արձագանքել Եվրասիական տնտեսական միության դատարանի որոշմանը: Ենթադրվում է, որ ՌՖՄ-ն չի փորձի հակադարձել ընդունված որոշմանը: Ավելի ստույգ՝ քիչ հավանական է, որ երկու երկրների ոչ այնքան մեծ քանակության ֆուտբոլիստներին լեգեոների կարգավիճակ տալու համար ռուսական ֆուտբոլային գերատեսչությունը գնա կտրուկ քայլերի:
