Մինչև դեկտեմբերի 7-ը Երևանի մամուլի ակումբը մոնիթորինգի է ենթարկել 6 համապետական հեռուստաալիք, 2 առցանց հարթարկ՝ News.am և 1in.am, և 7 մարզային հեռուստաընկերություն՝ պարզելու, թե ինչպես է լուսաբանվում նախընտրական քարոզարշավը:
Երևանի մամուլի ակումբի նախագահ Բորիս Նավասարդյանը լրագրողների հետ հանդիպմանը տեղեկացրեց, որ այն պահից, երբ «Իմ քայլը» դաշինքի նախընտրական ցուցակը գլխավորող Նիկոլ Փաշինյանը մտավ քարոզարշավի մեջ, նրանց տրամադրված հաճախականությունը միանգամից ավելացավ, «Իմ քայլի» տվյալները բարձրացան, քանի որ «Իմ քայլը» դաշինքն ասոցացվում էր կառավարության հետ:
«Այն բացասական վերաբերմունքը, որ կար ԶԼՄ-ներում մինչ նախընտրական քարոզարշավը, շարունակվեց նաև նախընտրական քարոզարշավի ժամանակ: Համապետական հեռուստաալիքները համաչափ են լուսաբանել նախընտրական քարոզարշավը: Մեդիադաշտը բավական բազմազան է, որոշ ԶԼՄ-ներ մեծ թվով բացասական անդրադարձ են ունեցել իշխող քաղաքական ուժի մասին, դա նշանակում է, որ իշխանությունը չի վերահսկում ԶԼՄ-ները, և պարտադրանք չկա լուսաբանման ուղղվածության մասին»,- հավելեց բանախոսը:
