Արքայազն Ուիլյամի և Քեյթ Միդլթոնի հարսանեկան արարողությունը ամսագրերին բերել է 31 միլիոն դոլարի շահույթ: Այս մասին հաղորդում է AdWeek կայքը: Ամսագրերին 13 միլիոն շահույթը ապահովվել է դրանց մանրածախ առևտրից, 21 միլիոնը` զանազան հավելվածների և այլ թեմատիկ նյութերի շնորհիվ, որտեղ լուսաբանվել է թագավորական հարսանիքը:
Ամենաշատ ամսագիրը վաճառել է People-ը (մոտ 2.2 միլիոն օրինակ), որն ավելացրել է տպաքանակը 80%-ով: Ամսագրի խմբագրությունում նշել են, որ սա ամենահաջող համարն էր՝ սկսած 2008 թվից, երբ տպագրվել էին Անջելինա Ջոլիի և Բրեդ Փիթի երկվորյակների նկարները: Այն ժամանակ ամսագրի տպաքանակը կազմել էր 2.8 միլիոն օրինակ:
Երկրորդ տեղում US Weekly ամսագիրն է, որն ավելացրել էր տպաքանակը 40%-ով` հասցնելով այն 900 հազար օրինակի: Սակայն թագավորական արարողությունը չի կարողացել գերազանցել ամսագրերի տպաքանակի աճը՝ կապված 2009 թ. Մայքլ Ջեքսոնի մահվան հետ: Այն ժամանակ ամսագրերն ապահովել էին 67 միլիոն դոլարի շահույթ:
