«Պլաստիկ վիրաբուժությունը՝ ոչ միայն էսթետիկա, այլև վերականգնում»,- այսօր «Անցանկալի ելքերը և բարդությունները պլաստիկ վիրաբուժության մեջ» թեմայով 3-րդ միջազգային համաժողովի շրջանակում հայատարարված մամլո ասուլիսի ընթացքում նշեց Պլաստիկ վերականգնողական և էսթետիկ վիրաբույժների հայկական ասոցիացիայի տնօրեն, դոցենտ, Էրեբունի ԲԿ-ի պլաստիկ վիրաբուժության բաժանմունքի գլխավոր բժիշկ Արմեն Հովհաննիսյանը՝ խոսելով պլաստիկ վիրաբուժության մարդասիրական առաքելության մասին:
«Պլաստիկ վիրաբուժություն ասելով շատերը հասկանում են միայն գեղագիտական նպատակ ունեցող վիրահատությունները, սակայն պլաստիկ վիրաբուժությունն առաջացել է պատերազմների ժամանակ վերականգնողական նպատակներին ծառայելու համար, երբ անհրաժեշտություններ են առաջացել շուտափույթ պլաստիկ վերականգնումներ իրականացնել»,- ընդգծեց Ա. Հովհաննիսյանը:
Հիշեցնենք, որ Հայաստանում առաջին պլաստիկ վիրահատությունը՝ բութ մատի վերապատվաստում, իրականացվել է Ա.Լ.Միքայելյանի անվան ինստիտուտի միկրովիրաբուժության բաժանմունքում 1984 թ.-ին: Այսօր պլաստիկ վիրահատություններ Հայաստանում իրականցնում են Էրեբունի ԲԿ, Քանաքեռ-Զեյթուն ԲԿ, համալսարանական թիվ 1 կլինիկական հիվանդանոցներում:
«Մեր առաքելությունն է աջակցել պլաստիկ վիրաբուժության կրթությանն ու զարգացմանը ամբողջ աշխարհում և ստեղծել պլաստիկ վիրաբուժության էթիկա»,- նշեց պլաստիկ վերականգնողական և էսթետիկ վիրաբուժության միջազգային կոնֆեդերացիայի գործադիր տնօրենը՝ հավելելով, որ կոնֆեդերացիան ունի երեք մարդասիրական ուղղություններ՝ կանայք կանանց համար, վերականգնողական վիրաբուժություն, ծայրահեղ ծառայությունների մատուցում:
Նշենք նաև, որ միջազգային համաժողովի ընթացքում հայտարարված «Հանրային օրվա» շրջանակում կներկայացվեն վիրաբուժության վերջին նվաճումներն, տեխնիկաները և թեմաները՝ «Ճարպից ազատում և նոր կրծքագեղձի ստեղծում», «Լիպոսակցիա», «Դեմքի տրանսպլանտացիա»:
