Թուրքական Zaman թերթի փոխանցմամբ՝ Deutsch Türkische Nachrichten լրատվական պորտալին տված հարցազրույցի ժամանակ Եվրոպայի խորհրդի գլխավոր քարտուղար Թյորբորն Յագլանդն անդրադարձ է կատարել Թուրքիայի ներքաղաքական խնդիրներին.
«Եթե Թուրքիան ցանկանում է այնպիսի ժողովրդավարություն, ինչպիսին Եվրոպայում է, նա պետք է մեջքով շրջվի կառավարման իր հին ինստիտուտներին։ Էրդողանի նման փորձառու քաղաքական գործիչը հայտարարել է Նոր սահմանադրության ընդունման անհրաժեշտության մասին։
Այժմ Թուրքիան գտնվում է ժողովրդավարության ու Եվրոպայի մասնիկը դառնալու ճանապարհին։ Թուրքիան աստիճանաբար հրաժեշտ է տալիս իր անցյալին։ Թուրքիայում լուռ փոփոխությունների շրջան է։
Թեև Էրդողանի գլխավորած «Արդարություն և զարգացում» կուսակցությունն (ԱԶԿ) իր իշխանության ժամանակ շատ բան է արել, սակայն նրա առջև շարունակում են ծառացած մնալ բազմաթիվ խնդիրներ։ Օրինակ՝ քրդերի իրավունքների պաշտպանության հարցը։ Լրագրողների ձերբակալությունները նույնպես մտահոգում են մեզ»։
Հիշեցնենք, որ ԱԶԿ-ն Թուրքիայում իշխանության է եկել 2002 թվականի նոյեմբերին, և իր գործունեության ավելի քան 8.5 տարիների ընթացքում իրականացրել է ավելի բազմաքանակ արևմտյան բարեփոխումներ, քան իր նախորդ բոլոր կառավարությունները՝ միասին վերցրած։
