Այսօր կայացավ ազատամարտիկ, պահեստազորի գնդապետ Վոլոդյա Ավետիսյանին նվիրված «Անազատամարտիկը» ֆիլմի պրեմիերան: Ֆիլմի ընթացքում ցուցադրվեց Վոլոդյա Ավետիսյանի ողջ մարտական ուղին, ներառյալ՝ ազատամարտիկների սոցիալական խնդիրների համար նրա պայքարը և ձերբակալումը:
Ֆիլմի ավարտից հետո «Առաջին լրատվական»-ը զրուցեց Վոլոդյա Ավետիսյանի մոր՝ Սուսաննա Ավետիսյանի հետ, ով մեզ հետ զրույցում ասաց, որ մտքով չի անցել, թե իր որդուն կաշառակերության համար կբանտարկեն: Նա ասաց, որ իր տղան չորս ամիս պայքարում էր՝ ասելով, որ պիտի պայքարենք, ազատամարտիկները սոված կոտորվում են, ինչ պիտի անեն, որ չպայքարեն:
«Կաշառակերները տուն ունեն, հարստություն ունեն, իսկ ազատամարտիկները սոված են, ոչ մի անգամ չեմ նեղվել ու չեմ ասել՝ ինչ գործ ես անում: 25 տարի աշխատել է, 70 հազար դրամ փող է ստացել: Ես տուն ու տեղ չունեմ, վեց հատ էլ երեխա ունի, էդ երեխաներին ո՞վ պիտի պահի: Նստել է, չեմ մտածում, հերոս է նստել, կաշառակեր չի»,- ասաց նա:
Շնորհավորելով Զինված ուժերի կազմավորման 22-րդ տարեդարձը՝ տիկին Սուսաննան աշխարհին խաղաղություն ցանկացավ՝ թեկուզ մի կտոր հացով:
