Երևանում այսօր հունիսի 28-ին, առավոտյան ժամը 11:00-ի սահմաններում, հրդեհ է բռնկվել Մյասնիկյան պողոտայից դեպի Նոր Նորք գնացող ճանապարհի (գազանանոցի մոտ) ձախ թևում գտնվող սեփական տների այգիների տարածքում:
Ֆոտոլրագրող Գագիկ Շամշյանի տեղեկացմամբ՝ հրդեհը գրավել է շուրջ 10-15 հազար քմ մակերես և շարունակում է տարածվել մեծ արագությամբ:
Նշված հատվածում շուրջ 30-40 սեփական տներ կան, որոնց բնակիչներն իրենց ուժերով փորձում են մարել կրակը: Բնակիչների խոսքով՝ իրենք զանգահարել են հրշեջ ծառայություն, որտեղից հրշեջները ժամանել են միայն 30 րոպե անց:
Այս պահին հրշեջներն էլ են միացել բնակիչներին, սակայն քանի որ տեղանքն անանցանելի է, իսկ ճանապարհները գտնվում են անբարեկարգ վիճակում, բացի այդ՝ ճանապարհներին կան նաև ապօրինի շինություններ, ուստի տեխնիկան չի կարողանում մոտենալ կրակին:
Հրշեջները ոտքով են բարձրանում բարձունքները և բնակիչներն իրենց տներից դույլերով ջուր են փոխանցում հրշեջներին: Հրդեհն արդեն գրեթե հաջողվել է մարել։ Հրդեհաշիջման աշխատանքներին մասնակցել են նաև 7-8 տարեկան անչափահաս երեխաներ:
Հրդեհի պատճառները հայտնի չեն. դա պարզ կլինի ԱԻՆ հրշեջ ծառայության փորձաքննության արդյունքներից հետո:
