Միչիգանի իրավաբանական ընկերություններից մեկը դատի է տվել Լեդի Գագային՝ մեղադրելով նրան, որ Pray for Japan բարեգործական համերգից ստացված միջոցների մի մասը չի հասել Ճապոնիա: Այս մասին հունիսի 27-ին հայտնել է Contactmusic-ը: Դատարան ներկայացված հայցով ընկերությունը պահանջում է 5 մլն դոլար:
2011 թ. մարտին Ճապոնիայում տեղի ունեցած ավերիչ երկրաշարժից հետո Լեդի Գագան իր կայքում սկսեց վաճառել իր իսկ դիզայնով պատրաստված ապարանջաններ՝ We pray for Japan («Մենք աղոթում ենք Ճապոնիայի համար») գրառումով: Մեկ ապարանջանն արժեր 5 դոլար, ևս 3.99 դոլար պատվիատուն պետք է վճարեր առաքման համար: Ստացված բոլոր միջոցները պետք է ուղարկվեին Ճապոնիա երկրի վերականգնման համար:
Ապարանջանները մեծ տարածում գտան, և տեղեկություններ կային, որ արդեն 48 ժամ հետո ակցիայի շրջանակներում հավաքվել էր 250 հազար դոլար: Հետագայում ֆանատների մեծ մասը հայտարարել էր, որ զարդերն իրենց այդպես էլ չեն հասել: 1-800-LAW-FIRM ընկերության իրավաբանները, որոնք ներկայացրել են հայցը, պնդում են, որ առաքման գումարը շատ բարձր է եղել, իսկ ստացված գումարի տարբերությունը յուրացվել է երգչուհու խմբի կողմից: Նրանք նաև հայտարարել են, որ Լեդի Գագայի ներկայացուցիչները հրաժարվել են տեղեկություններ հայտնել այն մասին, թե ինչքան գումար է հավաքվել ակցիայի ընթացքում:
Անձամբ երգչուհին մեղադրանքների մասին որևէ մեկնաբանություն չի տվել:
