Իրանի ԱԳՆ պաշտոնական ներկայացուցիչը, պատասխանելով ԱՄՆ պետքարտուղար Ջոն Քերիի հայտարարությանը, նշել է, որ Իրանը երբեք միջուկային զենք չի արտադրել, չի պահեստավորել և չի օգտագործել, գրում է IRNA պետական հեռուստառադիոյի ռուսական ծառայությունը:
IRNA-ի տվյալներով՝ Իրանի ԱԳՆ պաշտոնական ներկայացուցիչ Մարզիյա Աֆհամը, շաբաթ օրը ելույթ ունենալով, ասել է, որ ԱՄՆ պետքարտուղարի հայտարարությունն այն մասին, թե տարածաշրջանի արաբական պետություններն այժմ ավելի պաշտպանված են, Իրանի միջուկային զենքի առումով մտացածին է և հիմնված է կեղծ ենթադրության վրա, որովհետև Իրանը երբեք չի ձգտել և չի ձգտի միջուկային զենք արտադրել, պահեստավորել կամ օգտագործել:
Իրանի ԱԳՆ պաշտոնական ներկայացուցիչն անիմաստ է համարում ԱՄՆ պետքարտուղարի հայտարարությունները, որոնք արվել են արաբալեզու հեռուստաալիքներից մեկին տված հարցազրույցի ժամանակ, և ասել է, որ Իրանը ընկերության ձեռք է մեկնում տարածաշրջանի բոլոր երկրներին և բարեկամական հարաբերություններ ունի փաստացի բոլոր պետությունների հետ:
Մարզիյա Աֆհամը Քերիի այդ հարցազրույցի մասին ասել է. «Այս հայտարարությունները ոչ դիվանագիտորեն են արված: Հավանաբար, խումբը, որը դեմ է ժնևյան պայմանավորվածություններին և մասնակցում է տարածաշրջանում բռնության տարածմանը, ոչ կառուցողական է ազդում ԱՄՆ կառավարական պաշտոնյաների վրա»:
Նշելով, որ ԱՄՆ-ն բացահայտ աջակցում է Իսրայելի ահաբեկչական գործողությունները, Իրանի ԱԳՆ պաշտոնական ներկայացուցիչը ավելացրել է, որ Սիրիայի գործերին Իրանի միջամտության մասին անհիմն հայտարարությունները տեղին չեն Սիրիայում և տարածաշրջանի այլ պետություններում ԱՄՆ-ի որոշ դաշնակիցների կողմից ահաբեկիչ-տակֆիրիտներին առաջկցելը արդարացնելու համար:
Մարզիյա Աֆհամն ասել է, որ աշխարհին սպառնում է ահաբեկչությունն և ծայրահեղականությունը, իսկ համաշխարհային հանրությունը, այդ թվում նաև ամերիկացի պաշտոնյաները չպետք է աչքերը փակեն այս մեծ սպառնալիքի վրա:
