Քաղաքագետներն ու քաղտեխնոլոգները դժվարանում են կանխատեսել, թե որտեղ կարող է հայտնվել ՀՀԿ-ն ընտրություններից հետո՝ խորհրդարանո՞ւմ, արտախորհրդարանակա՞ն ընդդիմության դերում, թե՞ պատմության քաղաքական աղբանոցում, ինչպես բնորոշել է Նիկոլ Փաշինյանը։
Քաղաքագետ Արմեն Բաղդասարյանի խոսքով՝ հավանականությունը մեծ է, որ 5 տոկոսի շեմը չհաղթահարելու պարագայում ՀՀԿ-ն հայտնվի արտախորհրդարանական ճամբարում, քանի որ այս ընտրություններից հետո արտախորհրդարանական ընդդիմադիր բևեռ այսպես թե այնպես ձևավորվելու է, քանի որ մի քանի առանցքային, լիբերալ ուժեր՝ «Ժառանգությունը», ՀԱԿ-ը, չեն մասնակցում ընտրություններին, բայցևայնպես ասպարեզից չեն հեռացել:
«Այս առումով ՀՀԿ-ի շանսերը ավելի քիչ են, քանի որ այս կուսակցության նկատմամբ հասարակական ընկալումը խիստ բացասական է, բայց հիմա ՀՀԿ-ն փորձում է ռեբրենդինգի ենթարկվել, նոր դեմքեր, նոր հռետորաբանություն է որդեգրել, համարյա չեն հիշատակում Սերժ Սարգսյանի անունը։ Այնպիսի տպավորություն է, որ Սերժ Սարգսյանը չի ղեկավարում ՀՀԿ-ն։ Մինչդեռ 6-7 ամիս ՀՀԿ-ում բոլորը միաբերան կրկնում էին, որ Սերժ Սարգսյանն իրենց անփոխարինելի առաջնորդն է։ Այսինքն՝ արդեն Սերժ Սարգսյանի անունը չկա, օլիգարխների կիսակրիմինալ վիճակները չկան առաջնագծում՝ երևացող մասում, ինչը ռեբրենդինգի բաղադրիչ է»,- «Առաջին լրատվական»-ի հետ զրույցում ասաց Բաղդասարյանը՝ հավելելով. «Իսկ եթե այդ ռեբրենդինգն ամբողջությամբ հաջող լինի, ապա իրենք քաղաքական աղբանոցում չեն հայտնվի, կմնան քաղաքական դաշտում ու խորհրդարանում չհայտնվելու դեպքում կարող են և լինել արտախորհրդարանական ընդդիմադիր ուժ՝ գործնականում ամեն ինչ սկսելով զրոյից»։
Քաղտեխնոլոգ Կարեն Քոչարյանը, սակայն, չի շտապում պնդել, որ ՀՀԿ-ն ԱԺ-ում չի հայտնվի։ Հակառակը, Քոչարյանի խոսքով, ՀՀԿ-ն լուրջ շանսեր ունի հայտնվելու խորհրդարանում: «Կանցնի խորհրդարան, թե չի անցնի՝ միայն ընտրություններից հետո կհասկանանք, բայց ես համոզված եմ, որ կանցնի։ Կա իրականություն։ Պարզ է, որ ՀՀԿ-ի կողմնակիցները առ այսօր դեռ ծպտուն չեն հանել, բայց այդպիսիք կան։ ՀՀԿ-ն այս տարիներին իր համար ստեղծել է սոցիալական բազա։ Լիքը մարդ այսօր իրենց կոնֆորտ չեն զգում։ Հենց դրանք էլ կլինեն ՀՀԿ-ի ընտրողը»,- «Առաջին լրատվական»-ի հետ զրույցում ասաց Քոչարյանը։
Մեր դիտարկմանը՝ այդ սոցիալական բազան կարող է լինել 5 տոկոս, դա բավարա՞ր է, որ ՀՀԿ-ն հայտնվի Ազգային ժողովում, քաղտեխնոլոգը պատասխանեց. «Պարզ է, չէ՞, որ ինչ-որ մարդիկ 20 տարի՝ ՀՀԿ-ի պաշտոնավարման տարիներին, լավ են ապրել, թալանել են, կոռուպցիայով են զբաղվել, թե ինչ են արել, բայց իրենք իրենց լավ են զգացել։ Եվ այդ մասսան 100 տոկոս 5 տոկոսից ավելի է։ Այնպես չէ, որ ՀՀԿ-ի պաշտոնավարման ժամանակ 1 տոկոսն էր լավ ապրում Հայաստանում։ Դա բուրգ էր՝ սկսած նախագահից մինչև ԺԵԿ-ի ու համատիրության պետ, որոնք կազմակերպում էին փողով ընտրությունները։ Այս մասսան, կրկնում եմ, հաստատ 5 տոկոսից ավելի է, ու հիմա իրենք դիսկոմֆորտի մեջ են ու ՀՀԿ-ի ընտրողն են»:
Կարեն Քոչարյանը հավելեց, որ այս ֆոնին անգամ սոցհարցումները չեն կարող իրական պատկերն արտացոլել, քանի որ սոցհարցման ժամանակ ոչ ոք ստեղծված իրավիճակում ռիսկ չի անի հայտարարել, որ ինքը ընտրելու է ՀՀԿ-ին: «Դրա համար հիմա կանխատեսում անելը սխալ կլինի»,- եզրափակեց Կարեն Քոչարյանը։
