ՀՀԿ ցուցակի առաջին համար Վիգեն Սարգսյանը ֆեյսբուքյան իր էջում գրառում է կատարել, որով բանավեճի է հրավիրել «Իմ քայլը» դաշինքի առաջնորդ Նիկոլ Փաշինյանին։
«Հաշվի առնելով, որ արդեն երրորդ օրն է՝ ձեր քարոզարշավը կառուցում եք ժողովրդին հանրապետականներով վախեցնելու վրա, խորացնելով հասարակությունը սևերի և սպիտակների կիսելու Ձեր արատավոր քաղաքականությունը, ինչպես նաև այն, որ քարոզչության ընթացքում թույլ եք տալիս ամենատգեղ և անվայել ձևով գռեհկացնել ընտրական գործընթացը, պահպանելով ընտրություններին մասնակցող բոլոր կուսակցությունների 1-ին համարների Հանրայինում կազմակերպվող բանավեճին մասնակցելու հանձնառությունս, այնուամենայնիվ անհրաժեշտ եմ համարում առանձին երկկողմ բանավեճ «ՀՀԿ-«Իմ քայլը» ձևաչափով»` 1-ին համարների մակարդակով»,- գրել է պաշտպանության նախկին նախարարը:
ՀՀԿ-ի մարտավարական խորամանկությունը տեսանելի է անգամ առաջին հայացքից։
Նախ՝ նման ձևաչափով բանավեճը, երբ ընտրություններին մասնակցում են 11 ուժեր, վիրավորական է մյուս կուսակցությունների հանդեպ, որոնք, ըստ էության, դրվում են «խաղից դուրս» վիճակում։ Ու սա այն դեպքում, որ «Իմ քայլը» դաշինքի ու ՀՀԿ-ի վարկանիշները, մեղմ ասած, համարժեք չեն, այլ խոսքով՝ նրանք, ըստ էության, մրցակիցներ չեն։
Սակայն շատ ավելի էական է խնդրի քաղաքական, բովանդակային բաղադրիչը։
Իհարկե, Նիկոլ Փաշինյանի թիմի համար խիստ գայթակղիչ է մասնակցել երկկողմ ձևաչափով նման բանավեճին, որովհետև շատ հեշտ է համոզիչ հաղթանակ տանել ՀՀԿ-ի հանդեպ։ Մյուս կողմից՝ հասարակությանը նույնիսկ հետաքրքիր էլ չէ նման բանավեճի բովանդակությունը, որովհետև ՀՀԿ-ի ֆոնին ցանկացած քաղաքական ուժ՝ անկախ ասելիքից, միանգամից «հրեշտակի» կերպարանք է ստանալու։
Այս վիճակն այսօր շատ պերճախոս նկարագրել է «Լուսավոր Հայաստան» կուսակցության նախագահ, համամասնական ցուցակի առաջին համար Էդմոն Մարուքյանը։ Էջմիածնում ունեցած նախընտրական հանդիպման ժամանակ նա ՀՀԿ-ի ու նրան բանավեճի առաջարկության մասին ասել է․ «Եթե իրենք հայտնվեն խորհրդարանում, կարող են ծառայել որպես «բոքսի տանձիկ» գործող իշխանության համար, այսինքն՝ գործող իշխանությունն ամեն առիթով կարող է բոքսել նրանց քաղաքական իմաստով, բայց նրանք չեն կարող լինել հակակշիռ։ Մեր քաղաքացիները խորհրդարանում «բոքսի տանձիկ» չպետք է ունենան, այլ ունենան ընդդիմադիր ուժ, որը կկարողանա փոխզսպել»։
«Բոքսի տանձիկ»-ին բանավեճում հաղթելը, իհարկե, Նիկոլ Փաշինյանից մեծ ջանքեր չի պահանջի, սակայն խորքային իմաստով՝ նման բանավեճի առաջարկությանը համաձայնելը կնշանակի, որ վարչապետն ընդունում է, որ հեղափոխությունը կարող է այլընտրանք ունենալ՝ ռևանշիզմի դեմքով։
Հենց սրան էլ ձգտում է ՀՀԿ-ն, որի մարտավարությունը կառուցված է նրա վրա, որպեսզի ԱԺ ընտրությունների արդյունքներով ռևանշիզմը լեգիտիմացվի՝ թեկուզև խորհրդարանական ընդդիմության դեմքով։
Նման իրավիճակում հեղափոխության խնդիրը պետք է լինի ոչ թե ՀՀԿ-ի ակնհայտ ցանկությունների լեգիտիմացումը, այլ դրանց լուսանցքայնացումը՝ Սերժ Սարգսյանի կուսակցության քաղաքական արխիվացումն ապահովելու նպատակով։
Ի վերջո, բոլորիս համար ակնհայտ է, որ ՀՀԿ-ի մասնակցությունն առաջիկա ընտրություններին նպատակ ունի՝ վիժեցնել դեմոկրատական այլընտրանքի ստեղծման հեռանկարը։ Ու այդ տրամաբանությամբ է կառուցված ՀՀԿ ամբողջ մարտավարությունը, անգամ քարոզչական նյութերում երբեմնի կառավարող կուսակցությունը ներկայանում է «սև»-ի կարգավիճակում՝ հասարակական գիտակցության մեջ ամրապնդելով այն մտայնությունը, որ ինքն է Նիկոլ Փաշինյանի իշխանության միակ այլընտրանքը։ Թե ինչ հետևանքների կարող է բերել ռևանշիստական «այլընտրանքը»՝ դժվար չէ կանխատեսել։
