ԱՄՆ-ում միջնորդագիր է կազմվել, որով երկրի իշխանություններից պահանջվում է հետ կանչել կանադացի երգիչ Ջասթին Բիբերին տրամադրված կեցության իրավունքն ու նրան արտաքսել իր հայրենիք: Միջնորդագիրը հայտնվել է Սպիտակ տան կայքի We, The People նախաձեռնությունների բաժնում: Ստորագրահավաքը սկսվել է հունվարի 23-ին. հենց նույն օրը երաժիշտը դարձել էր հերթական սկանդալի հերոս:
Մայամի Բիչ առողջարանային քաղաքի ոստիկանությունը ձերբակալել էր Բիբերին և մեղադրանքներ առաջադրել փողոցային մրցավազքի, անսթափ վիճակում մեքենա վարելու և իրավապահներին դիմադրություն ցույց տալու համար: Բերման ենթարկվելուց հետո նա խոստովանել է, որ օգտագործել է ալկոհոլ և մարիխուանա: Այս մասին հայտնում է RIA Novosti-ն:
Միջնորդագրում ասվում է, որ Բիբերը ոչ միայն սպառնում է իրենց ժողովրդի անվտանգությանը, այլև հիմար ազդեցություն գործում երիտասարդների վրա: Միջնորդագրի հեղինակները նշել են, որ ցանկանում են Բիբերին բացառել իրենց հասարակությունից:
Միջնորդագիրը վարչակազմի կողմից կուսումնասիրվի, եթե այն 30 օրում 100 հազար ստորագրություն հավաքի: Ներկայում միջնորդագրի ներքո իրենց ստորագրությունն են դրել մոտ 14 հազար մարդ:
