Ներկայում Եվրախորհրդարանում պատրաստվում է նախագիծ ուկրաինացի բարձրաստիճան պաշտոնյաների դեմ հավանական պատժամիջոցներ սահմանելու մասին, որոնք պատասխանատու են Կիևում ցույցերի ժամանակ ուժ կիրառելու համար: Ինչպես հաղորդում է UNN-ը, այս մասին հայտարարել է Եվրախորհրդարանի արտաքին գործերի կոմիտեի նախագահ Էլմար Բրոկը:
«Այժմ ընթանում է հավանական պատժամիջոցների սահմանման նախապատրաստություն: Պարզվում է, թե ովքեր կարող են հայտնվել դրանց ներքո: Սակայն սկզբում մենք պետք է սպասենք, որպեսզի տեսնենք ինչպես կավարտվեն բանակցությունները»,- ասել է նա և հավելել, որ տարբեր կառույցներում կան մարդիկ, որոնք արդեն կազմում են ցուցակները:
Անդրադառնալով պատժամիջոցների բնույթին՝ նա նշել է, որ խոսքը այցագրերի տրամադրման և հավանական է՝ հաշվեհամարների սառեցման մասին է:
