Մարդկային զարգացման միջազգային կենտրոնի նախագահ Թևան Պողոսյանի կարծիքով՝ դեկտեմբերի 6-ին ո՛չ Հայաստանի և ոչ էլ Բելառուսի թեկնածուները կդառնան ՀԱՊԿ գլխավոր քարտուղար, և դրանից կշահի երրորդ երկիրը: «Ռուսաստանը կպահի իր ներկայացուցչին։ Իսկ եթե երկու կողմերը ընկալեն, որ այստեսակ առճակատումներից կարող են այլ երկրներ շահել, դա այլ հարց է»,- «Առաջին լրատվական»-ի հետ զրույցում ասաց նա։
Թևան Պողոսյանն ընդգծեց՝ ՀԱՊԿ անդամ երկրները պետք է առաջացած խնդրի վերաբերյալ իրենց վերաբերմունքն արտահայտեն։ Մեր այն դիտարկմանը, թե ՀԱՊԿ-ում չեն հարմարվում Փաշինյանին ու այն ամենին, ինչ տեղի ունեցավ Հայաստանում, Թևան Պողոսյանը պատասխանեց. «Իսկ արդյոք մենք գնացե՞լ ենք ՀԱՊԿ որևէ անհատին հարմարվելու համար։ Իրենց համար ի՞նչ տարբերություն՝ Փաշինյա՞նն է, թե՞ վաղը ՀՀ քաղաքացիները այլ մարդու կընտրեն։ Իրե՞նք են որոշելու՝ ով է լինելու ՀՀ ղեկավարը։ Կարող է վաղը Բելառուսում այնպիսի մարդ լինի, որ մենք ընդհանրապես չընդունենք կամ շատ սիրենք։ Միջպետական հարաբերությունները այլ դաշտում են, անձնական խնդիր չէ»։
Մեր զրուցակիցը հավելեց. «Լուկաշենկոյի ու Փաշինյանի անձի խնդիրը չէ… Շատ ավելի լավ, նոր թարմ արյուն եք ստացել, միգուցե դուք էլ սովորեք։ ՀԱՊԿ անդամ երկրները պետք է երևույթի հանդեպ վերաբերմունք հայտնեն»։
Հարցազրույցն ամբողջությամբ՝ տեսանյութում:
