Դեկտեմբերի 9-ին կկայանան արտահերթ խորհրդարանական ընտրությունները, սակայն այսօր շատերը խոսում են այն մասին, որ այս ընտրությունների քաղաքական բաղադրիչը շատ թույլ է, ինչը կարող է բերել ընտրարշավի, որը չի կարող ձևավորել որակյալ իշխանություն։
Դուք կանխատեսել եք, որ «Իմ քայլը» դաշինքը իր քաղաքական բազմաշերտության պատճառով կարող է պառակտվել, և իբրև օրինակ բերել եք 1990-ականները, երբ ՀՀՇ-ն բաժանվեց երկու ֆրակցիայի։ Որո՞նք են այս իրավիճակի նմանություններն ու տարբերությունները «Առաջին լրատվական»-ի հարցին Ինֆորմացիոն տեխնոլոգիաների ձեռնարկությունների միության նախագահ Կարեն Վարդանյանը պատասխանեց․ «Գիտեք, քաղաքական իրավիճակը, այսինքն՝ մարդիկ, որ մասնակցում են ընտրությանը, դա օբյեկտիվ մի բան է, որովհետև Լուսնից քաղաքական գործիչներ չեն իջնելու։ Հայաստանում չկա ձևավորված իրական քաղաքացիական հասարակություն։ Ես նկատի չունեմ գրանտների վրա նստած մարդու իրավունքների պաշտպանության կառույցներին, որովհետև դրանք ֆեյք օրակարգ են։ Այսինքն՝ մարդու իրավունքները մեր մոտ շատ միակողմանի են մեզ հրամցվում, և իրականում չեն ծածկում էն հսկայական դաշտը, որը կոչվում է մարդու իրավունքներ։ Մարդու իրավունքները, սովորաբար, պաշտպանվում են հենց մարդկանց կողմից, և ամեն մարդ ինքն է հասկանում, թե որն է իր իրավունքը»։
«Ցավոք, 30 տարվա մեջ մեզ չհաջողվեց իրական քաղաքացիական հասարակություն ստեղծել, որը կարող էր հիմք հանդիսանար քաղաքական ուժերի համար, որովհետև քաղաքական ուժերը պետք է հիմնվեն այդ կազմակերպված հասարակության վրա և պատվերն ու ֆինանսավորումը հենց էնտեղից ստանան։ Մեր մոտ էդպես չեղավ։ Եվ այս սցենարը հիմա կկրկնվի, որովհետև մենք չենք տեսնում հայ ժողովրդի կողմից, հայ հասարակության կողմից որևէ ցանկություն իր սեփական շահերը պաշտպանելու։ Մենք ավելի շատ երկրպագու ենք, քան ցանկանում ենք պաշտպանել մեր իրավունքները։ Իսկ դրա համար պետք է սկսել կառույցների ստեղծմամբ, այսինքն՝ հանրությունը պետք է ինքնակազմակերպվի»,- հավելեց բանախոսը։
Ամբողջությամբ՝ տեսանյութում։
