Վանաձորի N զորամասում հունվարի 22-ի լույս 23-ի գիշերը, ժամը 02:00-03:00-ի սահմաններում, ութ մարդ ներխուժել է զինծառայողների ննջարան, քնից արթնացրել երեք զինծառայողների և ծեծի ենթարկել նրանց:
«Առաջին լրատվական»-ի տեղեկություններով՝ ծեծկռտուքի շարժառիթը հետևյալն է. զինծառայողներից մեկը, ով արդեն մեկ տարի է՝ ծառայում է այս զորամասում, մեկ ամիս առաջ կոնֆլիկտ է ունեցել մեկ այլ զինծառայողի հետ, սակայն կոնֆլիկտը հարթվել է: Մեկ ամիս անց, սակայն, զինծառայողի եղբայրը՝ Հայկ անունով, իմացել է և որոշել վրեժխնդիր լինել: Վերջինս յոթ հոգու հետ որոշել է գիշերը գալ զորամաս, քնից արթնացրել է տղաներին, հետո փախել: Բայց այդ ժամանակ մյուս զինծառայողները բռնել են երկուսին: Ներխուժողներից երկուսը մարմնական վնասվածք են ստացել, երկու զինծառայողներ այս պահին մարմնական վնասվածքներով գտնվում են Վանաձորի ռազմական ոստիկանությունում: Իսկ թե ինչպես են քաղաքացիները ուշ գիշերին ներխուժել զորամաս՝ պարզ չէ:
Մեր աղբյուրները փոխանցում են, որ տուժածների կյանքին սպառնացող լուրջ վնասվածքներ չկան: Զինվորը, որը եղել է ծեծկռտուքի պատճառը, նույնպես գտնվում է ռազմական ոստիկանությունում:
«Եկել էին վրեժ լուծելու: Ինչո՞ւ են ուզում դատել զինվորին, մի՞թե պետք է սպասեին, որ ծեծեն իրենց»,-ասաց մեր զրուցակիցը: Ի դեպ, ննջարան ներխուժածներից մեկի ծնողը աշխատում է ոստիկանական համակարգում:
Մեր ունեցած տեղեկուություններով՝ զինծառայողներից երկուսի նկատմամբ հարուցվել է քրեական գործ:
