ԱՄՆ Գյուղնախարարությունը և սննդամթերքի և դեղերի որակի վերահսկման վարչությունը (FDA) քննարկել են լաբորատորիայում աճեցված մսի վաճառքի հետ կապված հարցերը, հաղորդում է DW-ն՝ հղում անելով կողմերի համատեղ հայտարարությանը:
FDA փորձագետները կվերահսկեն կենդանիների բջիջների հավաքումը և դրանց աճեցումը, իսկ նախարարության ներկայացուցիչները կվերահսկեն սննդամթերքի արտադրությունը և պիտակավորումը:
Փաստաթղթի մանրամասները մշակման փուլում են: Կողմերը համոզված են, որ ծրագիրը «հաջողությամբ կիրականացվի» և «երաշխավորում է» այս ճանապարհով ստացված արտադրանքի անվտանգությունը:
Ներկայումս ԱՄՆ-ում փորձանոթի միս չի վաճառվում: Սակայն, որոշ ընկերություններ աշխատում են նվազեցնել ծախսերը և մտադիր են շուտով լաբորատորիաներում աճեցված մսից ստացված մթերքները շուկա հանել:
Ի տարբերություն Եվրամիության, ԱՄՆ լաբորատորիաներում միս աճեցնելը վիճահարույց թեմա չէ: Փորձանոթում միս արտադրողները նշում են, որ այս տեխնոլոգիան թույլ է տալիս խուսափել ջերմոցային գազերի արտանետումներից: Ֆերմերներն էլ լաբորատոր պայմաններում ստացված արտադրանքը միս կոչելը հարցականի տակ են դնում:
