Գրող, թարգմանիչ Հակոբ Մովսեսը, ով եղել է անկախ հանրապետության առաջին մշակույթի նախարարը, կանգնած է եղել մեր պետության կերտման ակունքներում, «Առաջին լրատվական»- ի հետ զրույցում անդրադառնալով դիտարկմանը, որ այս օրերին շատ են զուգահեռներ անցկացնում 90-ականների հետ, այնուամենայնիվ, կլինեն տարբերություններ, որովհետև փոխվել են ժամանակները, քաղաքական դեմքերը, նշեց. «Խանդավառության առումով՝ շատ նմանություններ կան. նոր իրավիճակ, նոր հնարավորություններ, նոր մթնոլորտ, նոր գաղափարներ, բայց տարբերություններն էլ վիթխարի են:
Կարևոր տարբերություններից է այն, որ առաջին կառավարությունն ավելի քիչ փորձ ուներ, քան այսօրվա երիտասարդ կառավարությունը, որը գուցեև աշխատանքային փորձ չունի, բայց քաղաքական բանավեճերի, անկումների ու վերելքների վիթխարի փորձ ունի, իրենք գիտեն՝ ինչ է ՀՀ-ն: Ես հավանում եմ այս սերնդին, կարծում եմ, անկախ իրենց աշխատանքային, գործնական կարողություններից ու հմտություններից, նրանք ճիշտ էթիկական չափանիշներով են մտել քաղաքականություն, տա Աստված, որ դրանք խաբուսիկ ու վերացական չլինեն: Սա մի սերունդ է, որ շատ բանից է զզվել: Մենք միայն սովետից էինք զզվել, բայց այս սերունդը 20-30 տարիների ընթացքում տեսել է բաներ, որոնք մեր պետությունը հետաճի մեջ են դրել, ժողովրդին դեգրադացրել: Եթե իրենք ազնվության իրենց պատկերացումների մեջ այսպիսի փորձ ունեն, ես դա համարում եմ վիթխարի փորձ»:
Մանրամասն՝ տեսանյութում:
