Պարտադիր կուտակային կենսաթոշակային համակարգի դեմ պայքարը ապակուսակցական է, ապաքաղաքական: Հունվարի 22-ին լրագրողների հետ հանդիպմանը «Դեմ եմ» նախաձեռնության անդամ Մանե Թանդիլյանը նշեց, որ անհիմն են խոսակցությունները, թե իրենց պայքարը կարող է ուղղորդվել ինչ-որ ուժի կողմից. նման բան չի եղել ու չի լինելու: Նա նաև կարևորեց, որ իրենց են միացել հայտնի անձինք:
«Դա շատ կարևոր է, երբ հայտնիներն ունեն իրրենց դիրքորոշումը: Սա իրոք մեծ ազդեցություն ունի քաղաքացիական բարձրակարգ հասարակարգ դաստիարակելու հարցում: Ես շատ կցանկանայի, որ հայտնիներն ունենան իրենց քաղաքացիական դիրքորոշումը և արտահայտեն, իսկ մարդիկ կկարողանան սեփական կարծիք ձևավորել՝ նաև նրանց լսելով: Այս քայլը ողջունում եմ:
Օրենքը, բնականաբար, օրենսդիրի միջոցով էր լուծում ստանալու, քաղաքացիները միայնակ չէին կարող պայքարել, և չի կարելի չարաշահել այդ հիմնավորումը: Այո, ինչ-ինչ կոչեր հնչում էին, բայց հիշում եք՝ մեր խումբը վանկարկում էր այն, ինչի համար պայքարում էին, բայց դա ոչ թե հակադրություն էր, այլ հիշեցում»,- ասաց նա՝ վերահաստատելով. սա միմիայն քաղաքացիական պայքար է:
Ռեժիսոր Սուրեն Թադևոսյանը նշեց, որ հարցազրույցներից մեկի ժամանակ իրեն ուղղված հարցը՝ ինչպես եղավ, որ մինչ այժմ չէին երևում, հիմա սկսեցին երևալ, իրեն զարմացրել է, սակայն այժմ նա ունի հարցի պատասխանը: «Երբ տրանսպորտի հետ կապված շարժումը եղավ, իմ ընկերներն էին պայքարում, ես էլ միացա, հասկացա, որ մեր՝ այնտեղ լինելը ինչ-որ օգուտ տվեց, նաև մարդիկ հասկացան՝ միասին պայքարելով գուցե ինչ-որ բան լինի: Երբ հասկանում ես, որ քո քայլը կարող է գոնե կես տոկոս օգուտ տալ, դու միանում ես էդ օրենքին»,- ասաց նա:
Նախաձեռնության մեկ այլ անդամ՝ Լևոն Հարությունյանը, նշեց, որ իրենց հետագա քայլերը կախված են զարգացումներից, ՍԴ որոշումից, որին մի քանի օր է մնացել: Սակայն անկախ դրանից (օրենքը հակասահմանադրական պիտի համարվի մարտի 28-ից սկսած դատական նիստերի ժամանակ), եթե անգամ հիմա կասեցնեն օրենքի կիրառումը, իրենք պիտի պայքարեն, որ այս օրենքը հակասահմանադրական ճանաչվի:
«Ձևեր չեմ ուզում նշել, միայն կասեմ՝ ավտոերթ էլի է լինելու: Թող չմտածեն, որ ոստիկանությունը, գալով, մեզ վախեցրեց, մենք համարներս կտանք, որ չտանջվեն: Մեր ամենամեծ խնդիրը տարանջատումն է միմյանցից: Ուզում եմ հավատալ, որ բոլորս հայ ենք, ու բոլորս պիտի պայքարենք մեր իրավունքների համար: Այս պայքարում ամենամեծ փաստն այն է, որ ձևավորվում է քաղաքացին՞ Ինչո՞ւ չեք գրում այդ մասին. քաղաքացի, որ արդեն իսկ պայքարում է իր իրավունքների համար, չի թողնելու՝ վաղը իրենց վզին ինչ օրենք ուզեն՝ փաթաթեն»,- ասաց նա:
Նրա խոսքով՝ չկա աշխարհում մի երկիր, որտեղ օրենքն այս ձևով մտցրած լինեն, սակայն ցանկացած քաղաքացի պիտի մտածի, որ իր ձայնն ինչ-որ բան կփոխի:
Լուսանկարը՝ Hetq.am-ի
