ՀՀ ԿԳՆ Գիտության պետական կոմիտեի նախագահ Սամվել Հարությունյանն ամփոփեց անցած տարվա կոմիտեի գործունեությունը: Նա նշեց, որ 2013թ. կոմիտեն օրենսդրական կարևոր նախաձեռնությամբ հանդես եկավ, այն է՝ ԱԺ կողմից առաջին ընթերցմամբ «Գիտական և գիտատեխնիկական փորձաքննության մասին» ՀՀ օրենքի նախագիծն էր, որը, կոմիտեի նախագահի խոսքով, հնարավորություն կտա միջազգային մակարդակին համապատասխան նախագծերի ընտրության ու արդյունավետ իրականացման, ինչպես նաև գիտության ոլորտի ֆինանսավորման արդյունավետության բարձրացման:
Բացի դրանից՝ կազմակերպվել է Գիտական և գիտատեխնիկական գործունեության թեմատիկ ֆինանսավորման 11 մրցույթ: Ֆինանսավորման է երաշխավորվել 159 գիտական թեմա բնական, հասարակական գիտությունների և հայագիտության բնագավառում:
2013-ին իրականացվել է նյութատեխնիկական բազայի արդիականացմանն ուղղված մրցույթ, ինչը ՀՀ-ում առաջին անգամ է իրականացվել, տրամադրվել է 305 միլիոն դրամ, ինչի շնորհիվ ձեռք են բերվել հինգ հետազոտական լաբորատորիաներ:
Բարձր արդյունավետությամբ աշխատող 97 գիտաշխատողներ մեկ տարի կստանան ամսական 135000 դրամ, ավելացել են նաև գիտական թեմաների ֆինանսավորման մրցույթների ծավալները, որտեղ ընդգրկված գիւտաշխատողների միջին աշխատավարձը 100.00 դրամ է՝ նախկին 65.000 դրամի փոխարեն:
Աշխատանքներ են արվել «Քենդլ» նախագծի առաջին փուլն ավարտելու ուղղությամբ: Հաջողությամբ ավարտվել են ԱՐԵԱԼ արագացուցչի հիմնական համակարգերի փորձարկումները:
