Այսօր բանավեճի էին հրավիրված ՀԱԿ ներկայացուցիչ Գուրգեն Եղիազարյանը և ԱԺ ՀՀԿ խմբակցության պատգամավոր Ռաֆիկ Պետրոսյանը, իսկ բանավեճի թեման կրկին կազանյան հանդիպումը և ընդդիմություն-իշխանության երկխոսության լինել չլինելու հարցն էր:
Անդրադառնալով կազանյան հանդիպմանը՝ Գուրգեն Եղիազարյանը նկատեց, որ կազանյան հանդիպումը գնահատելուց առաջ պետք է աչքի անցկացնել թուրքական և ադրբեջանական մամուլը, ինչը հատկապես տարօրինակ է այն առումով, որ այս անգամ նույնիսկ Թուրքիան մեզ ինչ որ տեղ խնայեց և լավ աչքերով էր նայում, իսկ Ադրբեջանը լռություն էր պահպանում և նախկինի պես լկտի հարձակվողական վերաբերոմունք չէր դրսևորում. դա էր պատճառը, որ Զարուհի Փոստանջյանին լռեցրեցին, որ ավելորդ հարցեր չտա. «բայց Կազանը ոչինչ չտվեց, կարճ ժամանակով այս ալիքը լռեցրեց, սակայն սպասեք մի նոր ալիքի, շատ արագ մի հանդիպում ևս կկայանա, որտեղ կողմերը մի նոր փաստաթուղթ կստորագրեն: Կազանի ետևում գործընթացներ են իրականացվում, որոնց մասին շատ քիչ բան գիտենք»,- կանխատեսեց Գուրգեն Եղիազարյանը, ինչպես նաև նկատեց, որ մենք այս գործընթացները հաշվի առնելով՝ իշխանություններին քարտ-բլանշ ենք տալիս, որ մեր իշխանությունների ներքին թուլությունն այդ գործընթացների վրա չազդի, հետևաբար մեր իշխանությունները իրավունք չունեն վնասելու մեր պետությունը:
ՀՀԿ պատգամավոր Ռաֆիկ Պետրոսյանի խոսքերով՝ այս անգամ Ադրբեջանը փոքր ինչ զուսպ էր, քանի որ երեք հզոր պետությունների նախագահներ հանդես եկան այս հարցում համաձայնության հասնելու ուղերձով: Միանշանակ Ռաֆիկ Պետրոսյանը նկատեց, որ ճիշտ է՝ կազանյան հանդիպումից հետո բեկումնային փոփոխություններ չեղան, բայց նաև կատաստրոֆիկ ձախողում չարձանագրվեց: Կողմերն արձանագրեցին, որ հարգում են մյուս կողմերի շահագրգռվածությունը հակամարտության գործընթացը լուծելու հարցում և որոշեցին շարունակել բանակցային խաղաղ կարգավորումը, իսկ ինչ վերաբերվում է երկխոսությանը, Գուրգեն Եղիազարյանը նշեց, որ իրենք այդ առումով նոր հայտարարությամբ հանդես կգան, իսկ Ռաֆիկ Պետրոսյանն էլ ավելացրեց, որ վերջին շրջանում իշխանության-ընդիմության հարաբերություններն անհամեմատ ավելի լավ են, քան նախկինում, հետևաբար իրենք նախկին իրավիճակին վերադառնալու ցանկություն չունեն և կողմ են երկխոսությանը, բայց ոչ պատվիրակության ֆորմատով, քանի որ պատվիրակություններով առհասարակ երկխոսում են պետությունները:
Ի դեպ, Գուրգեն Եղիազարյանն ավելացրեց, որ իրենց օրակարգում շարունակում է մնալ ԱԺ արտահերթ ընտրությունների անցկացումը, իսկ Ռաֆիկ Պետրոսյանը ավելացրեց, որ Հայաստանում արտահերթ ընտրությունների անցկացման ո՛չ հասարակական, ո՛չ իրավական պահանջ չկա:
