Երկրորդ նախագահ Ռոբերտ Քոչարյանի հարցազրույցներն արձագանք գտան նաև Սփյուռքում: Ֆրանսահայ գործարար, «Փարիզյան սուրճ»-ի նախկին սեփականատեր Վալերի-Աշխեն Գործունյանը զարմացած է, թե ինչու են վարչապետ Տիգրան Սարգսյանն ու Ռոբերտ Քոչարյանն իրար քննադատում, եթե երկուսն էլ միասին աշխատել են. «Երբ Քոչարյանը նախագահ էր, Տիգրան Սարգսյանը Կենտրոնական բանկի կառավարիչն էր: Այսինքն ինձ համար սա շինծու պատերազմ է, ժողովրդի ուշադրությունն ուրիշ տեղ շեղելու համար, որպեսզի շատ ավելի կարևոր և վտանգավոր բաների ժողովուրդն ու Սփյուռքը չանդրադառան»:
Նա չի հավատում, որ Տիգրան Սարգսյանն ու Ռոբերտ Քոչարյանը չէին կարող մի տեղ նստել և իրենց հարցերը պարզաբանել, սա քայլ է, որը միտված է Քոչարյանի PR-ին:
Ինչ վերաբերում է այն հարցին, թե ինչպես կարձագանքի Սփյուռքը Քոչարյանի վերադարձին, տիկին Գործունյանը պատասխանեց, որ Սփյուռքը կզարմանա, քիչ թե շատ խելացի և լրատվությանը հետևող սփյուռքահայը չի մոռացել Քոչարյանի օրոք տեղի ունեցած արյունահեղությունը: «Սփյուռքը շատ լավ տեղյակ է Հայաստանում արյուն թափելու պատմություններից, չկարծեք, թե սփյուռքահայությունը մոռացել է: Ես, օրինակ, չէի ընդունի նրա վերադարձը, չնայած չեմ էլ ընդունում Սերժ Սարգսյանին: Սփյուռքում լավ գիտեն, որ Քոչարյանը մեղավոր է Մարտի մեկի համար, որևէ նորմալ հայ չի կարող մոռանալ այդ մարդասպանությունը»,- ասաց նա:
Տիկին Գործունյանի գնահատմամբ՝ ՀՀ-ի քաղաքական դաշտի բոլոր գործիչների գործունեությունը միտված է ոչ թե Հայաստանի և հայ ժողովրդի շահերին, այլ իրենց գրպանները լցնելուն, բոլորը մարիոնետների պես գլուխները շարժում են, բայց ոչինչ չեն անում. «Դուք մտածում եք, որ Քոչարյանը կարող է ավելի՞ վստահություն ներշնչել, սխալվում եք: Եթե ինձ հարցնեք՝ ես չեմ վերադառնա ներդրումներ անելու Հայաստանում, եթե Քոչարյանը վերադառնա: Նա ինձ վստահություն չի ներշնչում, չնայած որ շատ կուզենայի, դա իմ երազանքն է»:
