Քաղաքագետ, ԱՊՀ երկրների ինստիտուտի հայկական մասնաճյուղի տնօրեն Ալեքսանդր Մարկարովը «Առաջին լրատվականի» հետ զրույցում անդրադառնալով կազանյան հանդիպման արդյունքներին և մինչ հանդիպումը հնչած լավատեսական հայտարարություններին ու առաջընթացի սպասելիքներին՝ նշեց, որ այս հարցում պետք է լինել ոչ թե լավատես կամ վատատես, այլ պետք է լինել իրատես.
«Միջազգային հանրությունը և մի շարք փորձագետներ բավականին ոգևորվել էին դովիլյան հայտարարությունից՝ ենթադրելով, թե դա որպես հիմք կծառայի Կազանում հիմնարար սկզբունքների ընդունման համար: Սակայն ինձ համար պարզ էր, որ Կազանում ամենաիրական սցենարը լինելու է որոշակի հռչակագրի ստորագրումը, որտեղ կողմերը կհայտնեն իրենց պատրաստակամությունը շարունակել բանակցային գործընթացը»:
Քաղաքագետը նշեց, որ Կազանի հանդիպումից հետո որպես դրական արդյունք կարելի է համարել բանակցային գործընթացի շարունակությունը: Մարկարովի գնահատմամբ, արդյունքում մնում է մեկ բան` շարունակել բանակցային գործընթացը, սակայն հաշվի առնելով, որ մոտենում է նախընտրական ժամանակաշրջան, ապա կտրուկ փոփոխություններ այդ ընթացքում տեղի չեն ունենա, պարզապես որոշակի ինտենսիվությամբ կշարունակվեն բանակցությունները. «Այս բանակցային գործընթացի մեջ ակտիվություն կարող է ներմուծել միայն մեկ հանգամանք, եթե բանակցությունների մեջ ներգրավվի նաև Ղարաբաղը»:
Ալեքսանդր Մարկարովն այս պահին անհավանական համարեց բանակցային ֆորմատի փոփոխությունը, քանզի նրա գնահատմամբ, թեև միջնորդները չեն իրականացնում իրենց հիմնական գործառույթը` խաղաղ համաձայնագրի տեքստի ներկայացումը, սակայն գոնե իրականացնում են մեկ այլ գործառույթ` վարում են խաղաղ բանակցություններ, ինչն էլ հետաձգում է ռազմական սցենարները:
Քաղաքագետը նաև անհավանական համարեց Մադրիդյան փաստաթղթի փոփոխությունը: Ըստ նրա` Մադրիդյան փաստաթուղթն արդեն մի քանի անգամ վերանայվել է և անընդհատ ենթարկվում է խմբագրման, բայց դրա հիմքում ընկած հիմնարար սկզբունքները չեն կարող փոխվել. «Բայց գուցե պետք է փոխել կողմերի դիրքորոշումները»:
