ԱՎԾ-ն հրապարակել է 2018թ. սեպտեմբերի հիմնական մակրոտնտեսական ցուցանիշները, նկատելի է որոշակի ցուցանիշների անկում: «Առաջին լրատվական»- ի հետ թեմայի շուրջ զրույցում անդրադառնալով հարցին, թե ինչու է դանդաղում տնտեսական աճի տեմպը՝ վարչապետի խորհրդական Մեսրոպ Առաքելյանը նշեց. «Սեպտեմբերի տնտեսական ակտիվության ցուցանիշը նախորդ տարվա սեպտեմբերի համեմատ կազմել է 0,2 տոկոս, այսինքն՝ սեպտեմբերին տնտեսական աճ չունենք: Հիմնական խնդիրը գյուղատնտեսության ոլորտում առկա մոտ 18 տոկոս անկումն է: Գյուղատնտեսության ոլորտի անկումը բերել է զրոյական ցուցանիշի: Սակայն տնտեսության ակտիվ ցուցանիշը տնտեսության և հասարակության բարեկեցության վրա լուրջ ազդեցություն չունի: Տարեկան կտրվածքով մոտ 4 տոկոս աճ կգրանցվի»:
Վարչապետի խորհրդականի խոսքով՝ եկամուտների բևեռացումը վերջին տասնամյակում խորացել է, ամենաբարձր եկամուտ ստացող 10 տոկոս բնակչությունը ամենացածր եկամուտ ստացող բնակչությունից 18 անգամ ավել եկամուտ է ստանում, տասը տարի առաջ այդ ցուցանիշը 13-14 տոկոս էր. սա նաև նշանակում է, որ տնտեսական աճը եկամուտ է ապահավում փոքր թվով մարդկանց համար, մինչև այժմ էլ ավելի ապահով էին:
«Եկամուտների առումով ամենահարուստ մարզը Սյունքին է, որտեղ միջին եկամուտը կազմում է 87 հազար դրամ, իսկ Շիրակի և Լոռու մարզերում այդ ցուցանիշը 3 անգամ ցածր է: Համայնքներն անհամաչափ են զարգացած: Կառավարությունը լուրջ անելիքներ ունի, որպեսզի տարածքները հնարավորինս համաչափ զարգանան: Մարզերում վիճակը վատ է, ունենք ոչ միայն արտաքին, այլ նաև ներքին միգրացիա»,- նշեց Մ. Առաքելյանը՝ հավելելով, որ ամեն ինչ պետք է արվի, որ մարզերի բնակիչները ցանկություն ունենան մնալու իրենց մարզում:
Մանրամասն՝ տեսանյութում:
