Ինտերնետ անվտանգության ոլորտի մի խումբ մասնագետներ այս շաբաթ Սինգապուրում հանդիպում են ունեցել, որի ժամանակ քննարկել են գլոբալ անվտանգության համակարգ ստեղծելու հարցը՝ պաշտպանվելու հաճախացած քիբերհարձակումներից: Այս մասին այսօր գրել է The New York Times-ը:
Մասնագետները սա «հուսո լույս» են համարում, քանի որ վերջին շրջանում հաքերական բազմաթիվ հարձակումները լուրջ մտահոգության տեղիք են տվել: Թերթը մանրամասնում է, որ գիտնականները մշակում են թվային կոդերի հատուկ համակարգ, որը թույլ կտա պաշտպանել ցանցային հոսքերը վնասակար ծրագրերից, այսինքն՝ ստուգել այն ամբողջ ինֆորմացիան, որը համակարգչին է հասնում ինտերնետից և հակառակը՝ գնում ինտերնետ:
The New York Times-ը նաև տեղեկացնում է, որ այս ծրագիրը մշակվում է արդեն մեկ տարի շարունակ: Նշվում է, որ թվային կոդերի համակարգը տեղակայվելու է Սինգապուրում, Ցյուրիխում և Սան Խոսեում: Այս կենտրոններն իրենց հերթին ապահովված են լինելու անվտանգության 5 մակարդակով: