Գրոհայինները զավթել են Բաղդադի արևմուտքում գտնվող Թավաբիջի բանտը և ազատ արձակել բանտարկյալներին: Ինչպես հաղորդել է Իրաքի ՆԳՆ-ն՝ ուղղիչ հաստատությունը ներկա պահին գտնվում է անվտանգության ուժերի վերահսկողության տակ:
Ահաբեկիչների զինված մի խումբ երեկոյան ժամերին գնդակոծել է բանտի շենքը: Դրանից հետո գրոհայինները զավթել են բանտը և ազատ արձակել բանտարկյալների մի մասին: Հրաձգության ժամանակ վիրավորվել են պահակային ծառայության աշխատակիցները, հաղորդում է ИТАР-ТАСС-ը:
Միաժամանակ ահաբեկիչները գնդակոծել և փորձել են գրավել Բաղդադի արևմուտքում գտնվող Մանսուր թաղամասի ամենամեծ առևտրի կենտրոնը: Նրանք կրակահերթ են բացել առևտրի կենտրոնի և դրան հարող այլ խանութների վրա: Անվտանգության աշխատակիցներին հաջողվել է կանխել սուպերմարկետը գրավելու գրոհայինների փորձերը: Դեպքի վայրը շրջապատված է իրաքյան բանակի ստորաբաժանումներով:
ՆԳՆ-ում նշում են, որ այս հարձակումները լավ կազմակերպված և միմյանց հետ կապված հանցագործություններ են: Հնարավոր տուժածների մասին տեղեկատվություն չի հաղորդվում:
