«Առաջիկա տարիների ընթացքում Ղարաբաղյան հակամարտության կարգավորման հնարավորություն չկա։ Կողմերի դիրքորոշումները այնքան հեռու են իրարից, որ նույնիսկ բանակցություններ չկան»,-«Առաջին լրատվական»-ի հետ զրույցում նման տեսակետ հայտնեց «Կովկաս» ինստիտուտի տնօրեն, քաղաքագետ Ալեքսանդր Իսկանդարյանը՝ անդրադառնալով ԱՄՆ նախագահ Թրամփի անվտանգության հարցերով խորհրդական Ջոն Բոլթոնի այն հայտարարությանը, թե ընտրություններից հետո ղարաբաղյան հարցի կարգավորման լավ հնարավորություն է ստեղծվում։
Իսկանդարյանը նշում է՝ ադրբեջանցիները կարգավորում համարում են 30 տարի առաջվա իրավիճակի վերադարձը, այսինքն՝ Ղարաբաղը Ադրբեջանի կազմում, իսկ հայկական կողմի համար դա դատարկ խոսակցություն է. «Իսկ Հայաստանում առավել արդիական է դառնում այն տեսակետը, որ ամեն ինչ պետք է մնա այնպես, ինչպես կա, այսինքն՝ ոչ մի կտոր հող չենք տալու, իսկ Ադրբեջանը պետք է Արցախի անկախությունը ճանաչի. դա անիմաստ է Ադրբեջանի համար։ Ղարաբաղյան հակամարտությունն այն վիճակում չէ, որ ընտրությունները ինչ-որ մի երկրում ազդեցություն ունենան»։
Ինչ վերաբերում է Երևանում և Բաքվում արված Բոլթոնի հայտարարություններին, Իսկանդարյանը նշեց. «Պետք է բացել հանրագիտարանը, վիքիպեդիան ու տեսնել, թե ով է պարոն Բոլթոնը, տեսնել, թե ինչպիսի հայտարարություններ է նա արել իր կյանքի նախորդ 25-30 տարիների ընթացքում, ինչպիսին է եղել այդ հայտարարությունների ճակատագիրը, ինչ աստիճանի էկզոտիկ են դրանք եղել, այդ հայտարարությունների շուրջ ինչ քննարկումներ են եղել։ Այսօրվա ամերիկյան քաղաքականության մեջ դիվանագետների աշխատանքի հիմնական գործիքը տրոլինգն է»։
Հարցազրույցն ամբողջությամբ՝ տեսանյութում։
