Moody’s Investors Service միջազգային վարկանիշային գործակալությունը բարձրացրել է Իռլանդիայի սուվերեն վարկանիշը՝ «աղբային» Ba1-ից հասցնելով Baa3-ի, վարկանիշային կանխատեսումը «դրական» է: Այս մասին հայտնում է RBK-ն՝ հղում անելով գործակալության մամլո հաղորդագրությանը:
Վերլուծաբանների որոշման վրա ազդել է երկու գործոն՝ իռլանդական տնտեսության աճի ներուժը և ԵՄ-ի ու ԱՄՀ-ի կողմից իրականացվող աջակցության ծրագրի պարտավորությունների կատարումը:
Moody’s-ը բարձրացրել է նաև Ակտիվների կառավարման Իռլանդիայի ազգային գործակալության պարտքային վարկանիշները (Ba1-ից Baa3, կանխատեսումը՝ կրկին դրական):
Դեռևս 2009-ին Իռլանդիայի վարկանիշը, Moody’s-ի գնահատմամբ, բարձրագույն մակարդակի վրա էր՝ Aaa, սակայն տեղական տնտեսությունը զգալիորեն կորցրեց մրցունակությունը, և 2011-ի ամռանը Moody’s-ն իջեցրեց վարկանիշը՝ հասցնելով «աղբային» մակարդակի:
