Կալիֆոռնիայի նահանգապետ Ջերի Բրաունի կարգադրությամբ այսօր արտակարգ դրություն է սահմանվել Կալիֆոռնիայում: Նահանգի բնակիչներին կոչ է արվել անհապաղ սկսել ջուր խնայել` տիրող խիստ երաշտի պատճառով: Այս մասին գրում է ITAR-TASS-ը:
Նահանգապետի խոսքերով` բնակելի տներում անհրաժեշտ է կամավոր կերպով նվազեցնել ջրի օգտագործումը 20 տոկոսով:
«Մենք հայտնվել ենք աննախադեպ և շատ լուրջ դրության մեջ: Շատ կարևոր է, որ բոլորը դա հասկանան և խնդրին պատասխանատվությամբ մոտենան»,- ասել է նա Սան Ֆրանցիսկոյում տեղի ունեցած մամլո ասուլիսի ժամանակ:
Նահանգում եղանակը շատ չորային է: Ջրամբարներում ջրի մակարդակը նորմայից ցածր է: Ըստ նահանգապետի` ջուրը տնտեսելու վերաբերյալ կոչերը դեռևս կամավոր բնույթ են կրում: «Մենք կշարունակենք հետևել իրավիճակին և եղանակին, և եթե ոչինչ չփոխվի, կարող են սահմանվել նորմատիվ նախաձեռնություններ»,- ասել է նահանգապետը:
