Երևանում այսօր՝ հունիսի 25-ի առավոտյան «Եռաբլուր» պանթեոնում դիակ է հայտնաբերվել:
Դեպքի վայրից ֆոտոլրագրող Գագիկ Շամշյանը հայտնել է, որ ժամը 08:25-ի սահմաններում անհայտ քաղաքացին զանգահարել է ոստիկանության Մալաթիայի բաժին և հայտնել, որ «Եռաբլուր» պանթեոնի մոտ տղամարդու դիակ կա:
Դեպքի վայր են ժամանել ոստիկանության Երևան քաղաքի վարչության պետ, ոստիկանության գեներալ-մայոր Ներսես Նազարյանը, ոստիկանության քրեական հետախուզության գլխավոր վարչության պետ, ոստիկանության գնդապետ Աշոտ Կարապետյանը, ոստիկանության Մալաթիայի բաժնի պետ, գնդապետ Լևոն Յազիչյանը, օպերգծով տեղակալ Գրիգոր Կարապետյանը, քննիչներն ու փորձագետը:
Պարզվել է, որ մահացածը ոստիկանության քրեական հետախուզության գլխավոր վարչության օպերլիազոր, ոստիկանության ավագ լեյտենանտ 25-ամյա Կորյուն Արզումանյանն է:
Դեպքի վայրում հավաքվածները ֆոտոլրագրողին հայտնել են, որ նա 1.5 ամիս առաջ ոստիկանության Մալաթիայի բաժնի քրեական հետախուզության բաժանմունքից տեղափոխվել է ոստիկանության քրեական հետախուզության գլխավոր վարչություն:
Դիակի մոտ ոստիկանները հայտնաբերել են ձեռագրով գրված մի նամակ, իսկ ձեռագրի հետևում համակարգչով հավաքված տեքստ, որտեղ, մասնավորապես, գրված է, որ «Ես ներողություն եմ խնդրում բոլորից…»:
Ըստ նախնական տեղեկությունների՝ Կ. Արզումանյանն ինքնասպան է եղել իրեն ամրակցված Մակարով տեսակի ատրճանակից: Օպերլիազորը մահացել է ծնոտին արձակված մեկ կրակոցով:
Ոստիկանության քննչական գլխավոր վարչության Երևանի քննչական վարչության Մալաթիայի քննչական բաժնի քննիչ Սուրեն Նավոյանի կողմից նշանակվել են մի շարք փորձաքննություններ, այդ թվում ձեռագրաբանական, դատաձգաբանական, դատաբժշկական, ձգաբանական և դատաքիմիական:
Քննչական բաժնում նյութեր են նախապատրաստվում: «Մակարով» տեսակի ատրճանակը առգրավվել և ուղարկվել է ոստիկանության փորձաքրեագիտական վարչություն:
Դին տեղափոխվել է դիահերձարան:
